काठमाडौं, २७ वैशाख । उपसभामुख रुवि कुमारी ठाकुरले प्रधानन्यायाधीश सिफारिस कार्यक्षमता मूल्यांकनका आधारमा गरिएको बताएकी छन् ।सामाजिक सञ्जाल फेसबुकमार्फत धारणा सार्वजनिक गर्दै उनले न्याय प्रणालीप्रति लामो समयदेखि जनतामा गुनासो रहेको उल्लेख गरेकी छन् । उनले मुद्दा टुंगिन अत्यधिक समय लाग्नु न्याय प्रणालीका लागि गम्भीर विषय भएको बताएकी छन् ।उपसभामुख ठाकुरले नियुक्ति कार्यक्षमता र योग्यताका आधारमा नभई दल वा पार्टीको प्रभावमा हुँदा त्यसको परिणाम पनि नकारात्मक देखिने उल्लेख गरेकी छन् ।प्रधानन्यायाधीश नियुक्ति कार्यक्षमता मूल्यांकनका आधारमा गरिएको छ । यसमा कुनै किन्तु–परन्तुको आवश्यकता छैन, उनले लेखेकी छन् ।उनले राज्यका हरेक अंग देश, जनता र राज्यको हितका लागि काम गर्नुपर्ने उल्लेख गर्दै संविधान, कानुन र जनहित सर्वोपरि हुनुपर्ने बताएकी छन् ।निष्पक्ष, सक्षम र जिम्मेवार न्याय प्रणाली नै लोकतन्त्रको वास्तविक आधार हो, उनले भनेकी छन् ।

उपसभामुख ठाकुरले आफ्नो धारणा नेपाली र मैथिली भाषामा फेसबुकमा सार्वजनिक गरेकी हुन् । उनले उक्त पोस्टसँगै ‘च्याट जीपीटी’को स्क्रिन सटसमेत राखेकी छन् ।