काठमाडौं । नेकपा एमालेकी संसदीय दलकी उपनेता पद्मा अर्यालले बालबालिकाको सामाजिक सञ्जाल प्रयोगमा उमेर हद तोक्न सरकारसँग माग गरेकी छन्।

प्रतिनिधिसभाको बैठकमा बोल्दै अर्यालले सामाजिक सञ्जालको बढ्दो दुरुपयोगले बालबालिकाको व्यवहार, पारिवारिक सम्बन्ध र सामाजिक संरचनामा नकारात्मक असर पारिरहेको भन्दै सरकारले तत्काल मापदण्ड बनाउनुपर्ने बताइन्।

उनले अस्ट्रेलियाले बालबालिकाको सामाजिक सञ्जाल प्रयोगका लागि उमेर सीमा तोकेको उदाहरण दिँदै नेपालले पनि यस विषयमा ढिला गर्न नहुने बताइन्।

अर्यालले प्रविधि र सामाजिक सञ्जालको दुरुपयोगका कारण समाजमा अराजकता बढ्दै गएको तथा पारिवारिक सम्बन्धसमेत प्रभावित भइरहेको दाबी गरिन्।

‘आज प्रविधिका माध्यमबाट, सामाजिक सञ्जालका माध्यमबाट हाम्रो समाजलाई विकृत बनाउने काम भएको छ। समाज धेरै अराजक बनेको छ,’ उनले भनिन्।

उनका अनुसार सामाजिक सञ्जालका सामग्रीले परिवारभित्रको सम्बन्धमा समेत असर पारिरहेको छ। सामाजिक सञ्जालकै कारण श्रीमान्–श्रीमतीबीचको सम्बन्ध बिग्रने र परिवार खण्डित हुने अवस्था बढिरहेको उनले बताइन्।

बालबालिकाको व्यवहारमा असर

अर्यालले सामाजिक सञ्जालको अत्यधिक प्रयोगका कारण बालबालिकामा काम गर्ने जाँगर घट्दै गएको र घरभित्रै सीमित हुने प्रवृत्ति बढेको बताइन्।

‘काम गर्ने जाँगर मरेको छ। कोठाभित्र बस्ने बानी परेको छ। साँच्चै भविष्य के हुन्छ भन्ने प्रश्न उठिरहेको छ,’ उनले भनिन्।

बालबालिकाको मौलिकता र सिर्जनशीलता जोगाउन पनि सामाजिक सञ्जाल प्रयोगमा उमेरअनुसारको सीमा आवश्यक रहेको उनको भनाइ छ।

तत्काल मापदण्ड बनाउन आग्रह

अर्यालले सरकारले बालबालिकाका लागि सामाजिक सञ्जाल प्रयोगसम्बन्धी स्पष्ट मापदण्ड र वर्गीकरण निर्धारण गर्नुपर्ने बताइन्।

अन्य मुलुकले उमेर र सामग्रीका आधारमा सामाजिक सञ्जाल प्रयोगमा सीमा निर्धारण गर्न थालेको उल्लेख गर्दै उनले नेपालले पनि तत्काल आवश्यक कानुनी तथा नीतिगत व्यवस्था गर्नुपर्नेमा जोड दिइन्।

Originally published on abcnews.com.np.