काठमाडौ , जेठ १५ गते । बागमती प्रदेशका मुख्यमन्त्री इन्द्रबहादुर बानियाँले १९ औँ गणतन्त्र दिवस २०८३ को अवसरमा सम्पूर्ण नेपाली दिदीबहिनी तथा दाजुभाइहरूमा हार्दिक बधाई तथा सुख, शान्ति र समृद्धिको शुभकामना व्यक्त गरेका छन्। मुख्यमन्त्री बानियाँले शुभकामना सन्देश जारी गर्दै संघीय लोकतान्त्रिक गणतन्त्र नेपाली जनताको दशकौँ लामो बलिदानीपूर्ण संघर्ष, जनआन्दोलन र सहिदहरूको त्यागको प्रतिफल भएको उल्लेख गरेका छन्। उनले गणतन्त्र प्राप्तिका लागि जीवन उत्सर्ग गर्ने ज्ञात–अज्ञात सहिदहरूप्रति भावपूर्ण श्रद्धाञ्जली अर्पण गर्दै आन्दोलनका क्रममा घाइते तथा अपाङ्गता भएका वीर योद्धाहरूप्रति उच्च सम्मान प्रकट गरेका छन्। सन्देशमा संविधानद्वारा सुनिश्चित संघीय लोकतान्त्रिक गणतन्त्रात्मक व्यवस्थाले नेपाली समाजलाई समावेशी, न्यायमुखी र जनतामुखी शासनतर्फ अघि बढाएको उल्लेख गरिएको छ। उनले राजनीतिक अधिकार प्राप्तिपछि अबको मुख्य लक्ष्य सुशासन, विकास र समृद्धि हासिल गर्नु रहेको बताएका छन्। मुख्यमन्त्री बानियाँले बागमती प्रदेश सरकार सबै वर्ग, क्षेत्र, लिङ्ग र समुदायको समावेशी तथा समानुपातिक विकासका लागि प्रतिबद्ध रहेको उल्लेख गर्दै नागरिकको दैनिक जीवनमा प्रत्यक्ष परिवर्तन ल्याउने गरी सेवा प्रवाहलाई प्रभावकारी बनाइने विश्वास व्यक्त गरेका छन्। उनले राष्ट्रिय एकता, सहकार्य र लोकतान्त्रिक मूल्य मान्यताको संरक्षण गर्दै समुन्नत राष्ट्र निर्माणको अभियानमा सबै एकजुट हुनुपर्ने आवश्यकता औँल्याएका छन्। साथै गणतन्त्र दिवसले सम्पूर्ण नेपालीमा नयाँ ऊर्जा, उत्साह र संकल्प प्रदान गर्ने विश्वास व्यक्त गर्दै पुनः शुभकामना दिएका छन्।