काठमाडौं २० जेष्ठ । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले भदौ २३ र २४ गतेका घटनाहरू सामान्य आन्दोलन वा क्रान्ति नभई तत्कालीन सरकारलाई विस्थापित गर्न रचिएको पूर्वनियोजित षड्यन्त्र भएको दाबी गर्नुभएको छ।

उहाँले राष्ट्रिय मानव अधिकार आयोगको प्रतिवेदनको सारांशलाई उद्धृत गर्दै ती घटनाहरू प्रायोजित र आपराधिक गतिविधिको हिस्सा भएको टिप्पणी गर्नुभएको हो।

ओलीका अनुसार तत्कालीन जननिर्वाचित बहुमत सरकारलाई संवैधानिक, कानुनी र संसदीय प्रक्रियाबाट हटाउन नसकेपछि अवैधानिक र आपराधिक मार्ग अपनाइएको थियो। उहाँले घटनाको पृष्ठभूमिमा लामो समयदेखि योजना, तयारी र प्रशिक्षणसमेत गरिएको दाबी गर्नुभयो।

उहाँले आगजनी, पेट्रोल बम निर्माण, र प्रज्वलनशील पदार्थ प्रयोगसम्बन्धी गतिविधिहरू पहिले नै योजनाबद्ध रूपमा गरिएको उल्लेख गर्नुभयो। साथै विभिन्न स्थानमा नेताहरूको घर तथा सरकारी संरचनाहरू पहिचान गर्न डिजिटल माध्यम प्रयोग गरिएको समेत दाबी गर्नुभयो।

ओलीले लोकप्रिय नेताहरूलाई बदनाम गर्ने र झुटा आरोपमार्फत जनमत प्रभावित गर्ने प्रयास पनि सोही योजनाको हिस्सा भएको आरोप लगाउनुभयो।

उहाँले ती घटनालाई “काँक्रो खाएर बियाँ अर्काको गालामा टाँस्ने” प्रवृत्तिसँग तुलना गर्दै दोष अरूलाई थोपर्ने प्रयास भएको टिप्पणी गर्नुभयो।

राजनीतिक विश्लेषकहरूका अनुसार ओलीको यो अभिव्यक्ति पछिल्लो राजनीतिक घटनाक्रमप्रति कडा आरोपसहितको प्रतिक्रिया मानिएको छ।