काठमाडौं २२ जेष्ठ । दक्षिण कोरियामा हालै सम्पन्न स्थानीय निर्वाचनमा सत्तारुढ लिबरल डेमोक्रेटिक पार्टीले भारी बहुमतका साथ शानदार विजय हासिल गरेको छ । निर्वाचन आयोगद्वारा सार्वजनिक गरिएको तथ्याङ्कअनुसार डेमोक्रेटिक पार्टीले देशभरका अधिकांश स्थानमा आफ्नो वर्चस्व कायम गरेको हो । बिहीवार सम्पन्न मतगणनाको अन्तिम परिणामअनुसार १६ महानगर प्रमुख तथा प्रान्तीय गभर्नरका पदहरूमध्ये डेमोक्रेटिक पार्टीले १२ स्थानमा जित दर्ता गरेको छ । विजयी क्षेत्रहरूमा गेओङ्गी प्रान्त, पश्चिम बन्दरगाह शहर इनचोन, दक्षिण–पूर्वी शहर बुसानका साथै लिबरलहरूको गढ मानिने दक्षिण र उत्तर जेओला प्रान्तहरू रहेका छन् । 
अर्कोतर्फ, मुख्य विपक्षी कन्जरभेटिभ दल पिपुल पावर पार्टीले राजधानी सोल, दक्षिण–पूर्वी शहर डेगु तथा दक्षिण र उत्तर ग्योङसाङ प्रान्तसहित ४ स्थानमा मात्र जित निकाल्न सफल भएको छ ।यसैगरी, १४ संसदीय क्षेत्रका लागि भएको उपनिर्वाचनमा डेमोक्रेटिक पार्टीले ९ सिट जितेको छ भने पिपुल पावर पार्टीले ४ सिटमा विजय प्राप्त गरेको छ । बुसानको एक क्षेत्रमा भने स्वतन्त्र उम्मेदवार निर्वाचित भएका छन् । 
दोस्रो वर्षमा प्रवेश गरेको राष्ट्रपति ली जे–म्युङ नेतृत्वको सरकारका लागि यस स्थानीय निर्वाचनलाई एक प्रकारको जनमत सङ्ग्रहको रूपमा हेरिएको थियो । राष्ट्रपतिको उच्च लोकप्रियताका कारण डेमोक्रेटिक पार्टीले प्रत्येक चार वर्षमा हुने यस निर्वाचनमा देशव्यापी पकड जमाउन सफल भएको विश्लेषण गरिएको छ । रियलमिटरले गरेको हालैको सर्वेक्षणअनुसार राष्ट्रपति लीको लोकप्रियता करिव ६० प्रतिशत रहेको छ ।