के रवि लामिछानेको यो स्पष्टोक्तिले विपक्षीहरूको आशंकालाई पूर्णविराम लगाउला, कि आगामी दिनमा राजनीतिक समीकरणमा कुनै नयाँ मोड आउनेछ?
काठमाडौँ — पाँचदिने भारत भ्रमण सकेर शुक्रबार स्वदेश फर्किएका राष्ट्रिय स्वतन्त्र पार्टी (रास्वपा) का सभापति रवि लामिछाने विमानस्थल ओर्लिनेबित्तिकै राजनीतिक वृत्तमा तरंग पैदा गर्ने प्रश्नको सामना गर्नुपर्यो।
पछिल्लो समय ‘रवि भारत भ्रमणबाट फर्किएलगत्तै प्रधानमन्त्री बन्दैछन्’ भन्दै विपक्षी दलहरूले गरेको आशंका र आरोपबारे सोधिएको प्रश्नमा लामिछानेले सुरुमा निकै संक्षिप्त र अर्थपूर्ण जवाफ दिए— ‘म केही भन्न चाहन्न।’
‘हल्लाको पछाडि लाग्ने समय छैन’
विमानस्थलको माहोल एकाएक तातियो। विपक्षीहरूले लगाइरहेको ‘आशीर्वाद लिन गएको’ र ‘सत्ता समीकरण बदल्न लागेको’ आरोपबारे थप प्रष्ट पार्न सञ्चारकर्मीले दबाब दिए। तर, लामिछानेले आफू यस्ता आधारहीन आशंकाहरूमा अल्झिन नचाहेको संकेत गरे।
उनको यो ‘मौनता’ मा धेरै कुरा लुकेको कतिपयको विश्लेषण छ भने लामिछाने आफैँले भने यसलाई ‘राजनीतिक स्थिरता’ सँग जोडे।
‘हामी स्थिरताको पक्षमा छौँ, वाचा तोड्दैनौँ’
केही बेरको मौनतापछि लामिछानेले आफ्नो अडान प्रष्ट पारे। उनले आफू र आफ्नो पार्टी राजनीतिक अस्थिरताको खेलमा नलाग्ने बताउँदै भने, “चुनावअघि हामीले जनतासँग जे-जे प्रतिबद्धता गरेका छौँ, त्यो कागज एक पटक फेरि पढेर आउन म आग्रह गर्छु।”
उनले थपे, “हामी अस्थिरताको पक्षमा छैनौँ। हामी स्थिरताको पक्षमा छौँ। नेपाली जनताले हामीलाई स्थिर सरकारका लागि मत दिएका हुन्। हामीले बोलेको र लेखेको वाचाप्रति पूर्ण प्रतिबद्ध छौँ र त्यसमा अडिग रहिरहन्छौँ।”
विपक्षीलाई घुमाउरो चेतावनी
प्रधानमन्त्री पदको चर्चालाई उनले ठाडै अस्वीकार गर्दै आफ्नो ध्यान सरकारको स्थिरता र विकासमा रहेको बताए। विपक्षी दलहरूले हरेक कुरामा ‘किचलो’ गर्ने र हरेक घटनालाई ‘सरकार ढल्ने’ सँग जोडेर अनावश्यक हल्ला गर्ने प्रवृत्तिप्रति उनले असन्तुष्टि जनाए।
“कुनै पनि भ्रमण वा भेटघाटलाई सरकार ढाल्ने वा जोड्ने खेलसँग जोडेर गरिने हल्लाले देशलाई अघि बढाउँदैन,” उनको आशय थियो।
लामिछानेको यो अभिव्यक्तिले तत्कालका लागि सत्ता परिवर्तनको चर्चालाई मत्थर पार्न खोजेको छ, तर उनको ‘पारदर्शी’ भारत भ्रमण र उच्चस्तरीय भेटघाटले नेपाली राजनीतिको ‘पावर कोरिडोर’ मा भने नयाँ बहसलाई जीवितै राखेको छ।
शुक्रबार त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै सभापति लामिछानेले सीमा समस्या समाधान ढोल बजाए जसरी हल्ला गरेर समाधान नहुने बताए।
‘कुनै पनि कुराहरू दुई देशको कूटनीतिक च्यानलमार्फत गराउने कुरा एकदमै महत्त्वपूर्ण हुन्छन्। त्यो विषयमा हल्ला गरेजस्तो ढोल बजाएर हुँदैन,’ लामिछानेले भने, ‘तर ढोल नबजाइकन आफ्नो देशको बारेमा गर्ने कुराहरू गर्नुपर्ने ठाउँमा, गर्नुपर्ने समयमा सरलवद्ध तरिकाले गर्नुपर्ने हुन्छ।’
सीमा समस्याका विषय उपयुक्त समय र प्रक्रियाअनुसार अघि बढाइने उनको भनाइ थियो। उपयुक्त समयमा कूटनीतिक संवादमार्फत हल गर्ने कुरामा भारत समेत तयार रहेको उनले बताए।
‘कुनै पनि कामका चरणहरू हुन्छन्। त्यस्ता चरणमा सीमाको विषयमा कुरा गर्नुपर्ने हुन्छ। त्यसकारण सडक र सदनको बहसभन्दा माथि उठेर कूटनीतिक माध्यमबाट समाधान गर्नुपर्छ,’ उनले भने।
के रवि लामिछानेको यो स्पष्टोक्तिले विपक्षीहरूको आशंकालाई पूर्णविराम लगाउला, कि आगामी दिनमा राजनीतिक समीकरणमा कुनै नयाँ मोड आउनेछ?
प्रतिक्रिया दिनुहोस्