काठमाडौं, २ जेठ । अमेरिका र इरानबीच मध्यपूर्वमा महिनौंदेखि चल्दै आएको द्वन्द्व अन्त्य गर्ने र रणनीतिक रूपमा महत्वपूर्ण हर्मुज जलडमरूमध्य पुनः सञ्चालनमा ल्याउने सहमति भएपछि सोमवार दक्षिण कोरियाली शेयर बजारमा ठूलो उछाल आएको छ । यस ऐतिहासिक सम्झौताले विश्वव्यापी ऊर्जा आपूर्तिमा रहेको चिन्तालाई कम गरिदिएको छ । कारोबार शुरु भएको पहिलो मिनेटमै दक्षिण कोरियाको बेन्चमार्क सूचक कोरिया कम्पोजिट स्टक प्राइस इन्डेक्स ४०२.५ अंक अर्थात ४.९५ प्रतिशतले बढेर ८,५२६.१२ को बिन्दुमा पुगेको थियो । स्थानीय समयअनुसार बिहान ९ः०७ बजेसम्ममा कोस्पी ३२७.७ अंक (४.०३ प्रतिशत) को वृद्धि हासिल गर्दै ८,४५१.३२ को बिन्दुमा कायम रह्यो । बजारमा आएको यो तिब्र उतारचढाव र खरिदको लहरका कारण कोरिया एक्सचेन्जले बाई–साइड साइडकार प्रणाली सक्रिय गर्नुपरेको थियो । यस अन्तर्गत कोस्पीमा सूचीकृत सेयरहरूको स्वचालित प्रोग्राम खरिद आदेशलाई पाँच मिनेटका लागि स्थगित गरिएको थियो । आईतवार पाकिस्तानले वासिङ्टन र तेहरानबीच द्वन्द्व अन्त्य गर्ने र महिनौंदेखि व्यावहारिक रूपमा ठप्प रहेको हर्मुज जलमार्गमा पुनः नौवहन सुचारु गर्ने सहमति भएको घोषणा गरेपछि लगानीकर्ताहरूको मनोबलमा निकै सुधार आएको हो । विश्वव्यापी तेल आपूर्तिका लागि यो जलमार्ग अत्यन्त महत्वपूर्ण मानिन्छ । यस सम्झौताको औपचारिक हस्ताक्षर समारोह आउँदो शुक्रबार हुने अपेक्षा गरिएको छ । यो ऐतिहासिक सफलताले विश्वव्यापी ऊर्जा बजारमा लामो समयसम्म पर्न सक्ने अवरोधको डरलाई शान्त पारेको छ र क्षेत्रीय सेयर बजारहरूमा लगानीकर्ताहरूको जोखिम बहन गर्ने उत्साहलाई थप बल पु¥याएको छ ।