काठमाडौं, ३ असार । विश्व फुटबलका उत्कृष्ट खेलाडीमध्ये एक किलियन एम्बाप्पेले दुई गोल गर्दै चम्किएपछि फ्रान्सले विश्वकपको आफ्नो पहिलो खेलमा सेनेगललाई ३–१ ले पराजित गरेको छ ।

२७ वर्षीय एमबाप्पेले यस खेलसँगै फ्रान्सका लागि सर्वाधिक गोल गर्ने खेलाडीको कीर्तिमान कायम गरेका छन् । उनले ५८औँ अन्तर्राष्ट्रिय गोल गर्दै ओलिर जिरुड लाई पछि पारे ।

संयोगवश जिरुड नै खेलमा कमेन्टेटरका रूपमा उपस्थित थिए र एम्बाप्पेले इन्जुरी समयमा दोस्रो गोल गरेपछि प्रत्यक्ष प्रसारणमै उनलाई बधाई दिएका थिए ।

एम्बाप्पे फ्रान्सका लागि विश्वकपमा सर्वाधिक गोल गर्ने खेलाडी पनि बनेका छन् । उनको विश्वकप गोल संख्या १४ पुगेको छ, जसले जस्ट फोन्टेनको १३ गोलको पुरानो कीर्तिमान तोडेको हो । फोन्टेनले सन् १९५८ को विश्वकपमा सबै १३ गोल गरेका थिए ।

यससँगै एम्बाप्पे विश्वकप इतिहासमा सर्वाधिक गोल गर्ने खेलाडीहरूको सूचीमा तेस्रो स्थानमा उक्लिएका छन् । उनी ब्राजिलका रोनाल्डोको १५ गोलभन्दा दुई गोलले मात्र पछाडि छन् भने विश्वकपमा १३ गोल गरेका अर्जेन्टिनाका लियोनल मेसीलाई उछिनेका छन् ।

विश्वकपमा सर्वाधिक १६ गोल गर्ने कीर्तिमान जर्मनीका मिरोस्लाभ क्लोजेको नाममा छ, जसबाट एम्बाप्पे अब दुई गोल मात्र टाढा छन् ।

एम्बाप्पेका अन्य उल्लेखनीय कीर्तिमान

–सन् २०१८ को विश्वकपमा पेरुविरुद्ध गोल गर्दै विश्वकपमा गोल गर्ने सबैभन्दा कान्छा फ्रान्सेली खेलाडी

–पेलेपछि विश्वकप फाइनलमा गोल गर्ने दोस्रो किशोर खेलाडी

–सन् २०१८ मा फ्रान्सलाई विश्वकप जिताउन महत्वपूर्ण भूमिका खेलेपछि फिफाको ‘यङ प्लेयर अफ द टुर्नामेन्ट’ अवार्ड

–सन् २०२२ को विश्वकप फाइनलमा अर्जेन्टिनाविरुद्ध ह्याट्रिक गर्दै विश्वकप फाइनलमा ह्याट्रिक गर्ने इतिहासकै दोस्रो खेलाडी । यसअघि सन् १९६६ मा इङ्ल्यान्डका जियोफ हर्स्टले यो उपलब्धि हासिल गरेका थिए।

–हालसम्म लगातार तीन विश्वकप संस्करणमा गोल गर्ने खेलाडी

–विश्वकपका पाँच फरक खेलमा दुई वा दुईभन्दा बढी गोल गर्ने एकमात्र खेलाडीको कीर्तिमान