चितवन, ११ असार । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनअन्तर्गत केन्द्रीय सदस्य निर्वाचनको नतिजा आउने क्रम जारी रहँदा कोशी र गण्डकी प्रदेश भूगोलतर्फका परिणाम सार्वजनिक भएका छन्। सार्वजनिक नतिजाले पार्टीभित्र नयाँ पुस्ताका नेताहरूको उदयसँगै केही स्थापित नेताहरूको पराजयसमेत देखाएको छ।

कोशी प्रदेश भूगोलतर्फ स्वास्थ्य मन्त्री निशा मेहता सर्वाधिक मतसहित निर्वाचित भएकी छन् भने गण्डकी प्रदेशमा सांसद मनिष खनाल पहिलो स्थानमा रहँदै केन्द्रीय सदस्यमा विजयी भएका छन्।

कोशीमा निशा मेहताको दबदबा

कोशी प्रदेश भूगोल समूहबाट स्वास्थ्य मन्त्री तथा रास्वपाकी नेतृ निशा मेहता ले सर्वाधिक १,८६१ मत प्राप्त गर्दै केन्द्रीय सदस्यमा निर्वाचित भएकी छन्। उनीसँगै प्रतिनिधिसभा सदस्य विश्वराज पोखरेल पनि १,४६० मत सहित विजयी भएका छन्।

त्यसैगरी नेतृ शोभा कार्की ले १,२०४ मत प्राप्त गर्दै केन्द्रीय समितिमा स्थान सुरक्षित गरेकी छन्। उनी अघिल्लो प्रतिनिधिसभा निर्वाचनमा समानुपातिक सांसदका लागि सिफारिस भए पनि अन्तिम सूचीमा अटाउन सकेकी थिइनन्।

कोशीबाट निर्वाचित अन्य नेताहरूमा कल्पना थापा (९३९ मत) र सुजाता तामाङ (८३९ मत) रहेका छन्।

कोशी प्रदेश भूगोलतर्फ प्रमुख मत परिणाम

चर्चित नेताहरू पराजित

कोशी प्रदेशमा पूर्व प्रदेश महामन्त्री तथा प्रतिनिधिसभा सदस्य लालविक्रम थापा पराजित भएका छन्। त्यस्तै झापा जिल्ला अध्यक्ष भइसकेका सांसद प्रकाश पाठक पनि केन्द्रीय सदस्य निर्वाचनमा विजयी हुन सकेनन्।

राजनीतिक रूपमा प्रभावशाली मानिएका नेताहरू पराजित हुनु र नयाँ अनुहारहरूको उदय हुनु महाधिवेशनको उल्लेखनीय पक्ष बनेको छ।

गण्डकीमा मनिष खनाल पहिलो

गण्डकी प्रदेश भूगोलतर्फ नवलपरासी–२ बाट निर्वाचित सांसद मनिष खनाल ले १,०१२ मत प्राप्त गर्दै सर्वाधिक मत ल्याएका छन्।

उनलाई पछ्याउँदै पोखराकी नेतृ पवित्रा थापा ले १,००४ मत प्राप्त गरेकी छन्। यी दुवै नेता प्रधानमन्त्री बालेन्द्र शाह निकट मानिन्छन्।

गण्डकी प्रदेशका प्रमुख मत परिणाम

गण्डकी प्रदेशबाट सांसद श्रीराम न्यौपाने को प्रदर्शन पनि उल्लेखनीय रह्यो। उनी पार्टी सभापति रवि लामिछाने र उपसभापति डा. स्वर्णिम वाग्ले बीचको समन्वयकारी पात्रका रूपमा चिनिन्छन्।

महाधिवेशनले देखायो नयाँ शक्ति सन्तुलन

रास्वपाको पहिलो महाधिवेशन केवल संगठन निर्माणको प्रक्रिया मात्र नभई पार्टीभित्रको वास्तविक शक्ति परीक्षणका रूपमा समेत हेरिएको छ। प्रदेशगत निर्वाचन परिणामहरूले पार्टीभित्र मन्त्री, सांसद, जिल्ला नेतृत्व तथा नयाँ पुस्ताका नेताहरूबीच प्रतिस्पर्धात्मक वातावरण रहेको संकेत दिएका छन्।

विशेषगरी कोशी र गण्डकी प्रदेशको नतिजाले रास्वपामा परम्परागत प्रभावभन्दा कार्यकर्ता र प्रतिनिधिहरूमाझ लोकप्रियता निर्णायक बन्न थालेको देखाएको छ। केही चर्चित नेताहरू पराजित हुँदा नयाँ अनुहारहरू केन्द्रीय नेतृत्वमा प्रवेश गरेका छन्, जसले आगामी दिनमा पार्टीको शक्ति सन्तुलन र नेतृत्व संरचनामा नयाँ समीकरण निर्माण हुने संकेत दिएको छ।

रास्वपाको महाधिवेशनअन्तर्गत अन्य प्रदेश तथा पदाधिकारीतर्फको मतगणना र निर्वाचन प्रक्रिया भने जारी रहेको छ।