काठमाडौं १९ असार । पशुसेवा विभागले बर्डफ्लु सङ्क्रमण भएका कुखुरा, हाँस, बट्टाइलगायत पन्छी बिक्री–वितरण गर्ने व्यवसायीमाथि कानुनबमोजिम कडा कारबाही गरिने चेतावनी दिएको छ।
विभागका प्रवक्ता डा. मुकुल उपाध्यायले आमनागरिकको स्वास्थ्यसँग खेलवाड नगर्न आग्रह गर्दै संक्रमित पन्छी बजारमा बिक्री गरेको पाइएमा कडा कानुनी कारबाही गरिने स्पष्ट पार्नुभयो।
विभागका अनुसार गत चैतदेखि देशका ११ जिल्लामा बर्डफ्लु फैलिएको छ। भाइरसले स्वरूप परिवर्तन गर्न सक्ने जोखिम रहेकाले संक्रमण नियन्त्रणका लागि उच्च सतर्कता अपनाइएको जनाएको छ। हाल काठमाडौं, ललितपुर, भक्तपुर, काभ्रेपलाञ्चोक, झापा, मोरङ, सुनसरी, महोत्तरी, बारा, चितवन र नवलपरासीमा प्राविधिक टोली परिचालन गरिएको छ।
संक्रमित क्षेत्रहरूमा ‘र्यापिड रेस्पोन्स टिम’ सक्रिय रहेको र केही जिल्लामा संक्रमण नियन्त्रणतर्फ उन्मुख रहेको विभागले जनाएको छ। मरेका कुखुरा जथाभावी फाल्ने वा संक्रमित पन्छी सुरक्षित रूपमा व्यवस्थापन नगर्दा मानिसमा समेत संक्रमण सर्न सक्ने जोखिम भएकाले विशेष सावधानी अपनाउन विभागले आग्रह गरेको छ।
विभागका अनुसार हालसम्म काठमाडौं उपत्यकासहित प्रभावित ११ जिल्लामा करिब ७ लाख पन्छी, ११ लाख अण्डा र ३ लाख किलो दाना नष्ट गरिएको छ।
प्रवक्ता डा. उपाध्यायले बर्डफ्लुविरुद्ध प्रभावकारी खोप विकास नभएकाले संक्रमण पुष्टि हुनेबित्तिकै पन्छी तथा पन्छीजन्य उत्पादन नष्ट गर्नु नै सबैभन्दा प्रभावकारी उपाय रहेको बताउनुभयो।
यसैबीच, प्रभावित जिल्लाका जिल्ला प्रशासन कार्यालयमार्फत नष्ट गरिएका पन्छीको मूल्यांकन तथा मुचुल्का संकलनको काम भइरहेको र प्रभावित किसानलाई क्षतिपूर्ति उपलब्ध गराउन आवश्यक विवरण संकलन भइरहेको विभागले जनाएको छ।
प्रतिक्रिया दिनुहोस्