काठमाडौं २१ असार । बितेका २४ घण्टामा काठमाडौं उपत्यकामा ट्राफिक नियम उल्लङ्घन गर्ने एक हजार ८१३ सवारीचालक कारबाहीमा परेका छन्। काठमाडौँ उपत्यका ट्राफिक प्रहरी कार्यालयका अनुसार उक्त कारबाहीबाट राज्यकोषमा पाँच लाख २८ हजार ५०१ रुपैयाँ राजस्व संकलन भएको छ।

प्रहरीका अनुसार मादक पदार्थ सेवन गरेर सवारी चलाउने नौ जना, नियमविपरीत ‘राइड सेयरिङ’ गर्ने १०५ जना, ट्राफिक सङ्केत बत्ती उल्लङ्घन गर्ने ११९ जना तथा तीव्र गतिमा सवारी चलाउने ११५ जनालाई कारबाही गरिएको हो। त्यसैगरी लेन अनुशासन पालना नगर्ने १०२ जना, निषेधित क्षेत्रमा हर्न बजाउने ७९ जना, सडकपेटीमा पार्किङ गर्ने ११७ जना, एकतर्फी सडकमा सवारी चलाउने ६५ जना तथा अन्य विभिन्न ट्राफिक नियम उल्लङ्घन गर्ने एक हजार ११० जनामाथि पनि कारबाही गरिएको ट्राफिक प्रहरीले जनाएको छ। ट्राफिक प्रहरीले सडक दुर्घटना न्यूनीकरण तथा सवारी अनुशासन कायम गर्न नियम उल्लङ्घन गर्नेहरूमाथिको निगरानी र कारबाहीलाई निरन्तरता दिइने जनाएको छ।