काठमाडौं — प्रमुख प्रतिपक्षी दल नेपाली कांग्रेसले सभामुख डोलप्रसाद अर्यालको संसदीय भूमिका निष्पक्ष र समन्वयकारी हुन नसकेको भन्दै सार्वजनिक रूपमा प्रश्न उठाएको छ। कांग्रेसले सभामुखले विपक्षी दलहरूको धारणा बुझ्ने नाममा “नाडी छाम्ने” प्रयास नगर्न चेतावनी दिँदै संसद् सञ्चालनमा सबै दलप्रति समान व्यवहार गर्न आग्रह गरेको छ।

सोमबार सिंहदरबारमा सञ्चारकर्मीसँगको अन्तरक्रिया कार्यक्रममा नेपाली कांग्रेसका संसदीय दलका नेता भीष्मराज आङ्देम्बेले सभामुख कुनै राजनीतिक दलको प्रतिनिधि नभई सम्पूर्ण संसद्को साझा अभिभावक भएकाले आफ्नो भूमिकाको संवैधानिक मर्यादा र निष्पक्षता कायम राख्नुपर्ने बताए।

उनले संसद्मा विपक्षी दलहरूले कुनै विषयमा विरोध जनाउँदा सबै दलका प्रतिनिधिलाई आफ्नो धारणा राख्ने अवसर उपलब्ध गराउनुपर्नेमा जोड दिए। सभामुखको चाहना अनुसार विपक्षीको तर्फबाट एक जनाले मात्र धारणा राख्ने अभ्यास उचित नभएको उनको भनाइ थियो।

आङ्देम्बेले प्रतिपक्षले सत्तापक्षबाट आउने विवादित अभिव्यक्तिका बाबजुद पनि संसद्को दैनिक कार्यसूची सञ्चालनमा निरन्तर सहयोग गर्दै आएको उल्लेख गर्दै त्यसलाई कमजोरीका रूपमा व्याख्या नगर्न चेतावनी दिए। उनले प्रतिपक्षको सहयोग मुलुकको हितलाई केन्द्रमा राखेर गरिएको भन्दै त्यसलाई सकारात्मक रूपमा लिन आग्रह गरे।

कांग्रेसका अनुसार संसद्मा देखिएको अवरोधको मुख्य कारण सत्तापक्षले विपक्षीसँग आवश्यक समन्वय नगर्नु हो। उनले संवाद र सहकार्यको अभावले संसद्को प्रभावकारी सञ्चालनमा समस्या उत्पन्न भइरहेको बताए।

कांग्रेसको यो अभिव्यक्तिसँगै सभामुखको भूमिका, संसद्को निष्पक्ष सञ्चालन तथा सत्ता–प्रतिपक्षबीचको समन्वयको विषय फेरि राजनीतिक बहसको केन्द्रमा आएको छ।