तेहरान,(एजेन्सी) – अमेरिकाले इरानको दक्षिणी तटीय क्षेत्रमा पुनः व्यापक हवाई आक्रमण गरेपछि मध्यपूर्वमा तनाव थप चर्किएको छ। इरानले त्यसको प्रतिकारस्वरूप बहराइन, कुवेत, ओमान र जोर्डनस्थित अमेरिकी सैन्य अड्डाहरूलाई लक्षित गर्दै मिसाइल तथा ड्रोन आक्रमण गरेको दाबी गरेको छ।

इरानी अधिकारीहरूका अनुसार अमेरिकी आक्रमणमा दक्षिणी तटीय सहर बन्दर अब्बास, सिरिक, जास्क तथा केश्म टापु आसपास विस्फोट भएका थिए। इरानले केश्म टापुतर्फ करिब एक दर्जन “शत्रुपक्षका प्रोजेक्टाइल” प्रहार गरिएको जनाएको छ।

यसअघि अमेरिकी सेनाले इरानका कम्तीमा १४० वटा लक्ष्यमा आक्रमण गरेको जनाएको थियो। त्यसको जवाफमा इरानले बहरीन, कुवेत, ओमान, कतार र जोर्डनमा रहेका अमेरिकी सैन्य संरचनालाई निशाना बनाएको दाबी गरेको हो। यद्यपि यी दाबीहरूको स्वतन्त्र पुष्टि हुन सकेको छैन।

यसबीच विश्वको महत्वपूर्ण समुद्री व्यापार मार्ग हर्मुज जलडमरूमध्य केन्द्रित तनाव पनि बढेको छ। अमेरिकी राष्ट्रपति डोनाल्ड ट्रम्पले हर्मुज जलडमरूमध्य “खुला” रहेको दाबी गरेका छन्। तर इरानको पर्सियन गल्फ स्ट्रेट अथोरिटीले सुरक्षा अवस्था सामान्य नभएसम्म कुनै पनि समुद्री आवागमनलाई अनुमति नदिइने जनाएको छ।

हर्मुज जलडमरूमध्य विश्वको सबैभन्दा महत्वपूर्ण तेल ढुवानी मार्गमध्ये एक भएकाले त्यहाँको तनावले अन्तर्राष्ट्रिय ऊर्जा बजार र विश्व व्यापारमा असर पर्ने चिन्ता बढेको छ।

यस घटनाक्रमसँगै मध्यपूर्वमा सैन्य टकराव थप गम्भीर बन्दै गएको छ भने अन्तर्राष्ट्रिय समुदायले दुवै पक्षलाई संयमता अपनाउन र तनाव कम गर्न कूटनीतिक पहल गर्न आग्रह गरिरहेको छ।