काठमाडौँ — उद्योगदेखि खुद्रा बजारसम्म चामलको मूल्य बढेपछि उपभोक्ताको भान्सा महँगिएको छ । व्यवसायीका अनुसार तीन महिनाको छोटो अवधिमा प्रतिकेजी २० रुपियाँ र प्रतिबोरा ३५० देखि ४०० रुपियाँसम्म मूल्यवृद्धि भएको हो ।
चामलको मूल्य कति बढ्यो ?
नेपाल खुद्रा व्यापार सङ्घका अनुसार पछिल्लो तीन महिनामा स्टिम जिरा मसिना चामल प्रतिकेजी ८० रुपियाँबाट एक सय रुपियाँ र त्रिशूलीको पोखरेली चामल प्रतिकेजी ९५ रुपियाँबाट १२० रुपियाँ पुगेको छ । त्यस्तै लङ्ग्रेन बासमती चामल प्रतिकेजी १७५ रुपियाँबाट बढेर १९० रुपियाँ भएको छ ।
साल्ट ट्रेडिङ कर्पोरेसनका अनुसार २५ केजीको जिरा मसिनो चामल तीन महिनाअघि एक हजार आठ सय रुपियाँमा बिक्री हुँदै आएकोमा अहिले दुई हजार ३३० रुपियाँ पुगेको छ । सोना मन्सुली चामल प्रतिबोरा एक हजार ३५० बाट बढेर एक हजार ७५० रुपियाँ र बासमती (लङ्ग्रेन) २० केजीको मूल्य तीन हजार पाँच सय रुपियाँ पुगेको छ ।
नेपाल चामल, तेल, दाल उद्योग सङ्घका अनुसार नेपाल पूर्ण रूपमा आयातमा निर्भर रहेकाले अन्तर्राष्ट्रिय बजार, विशेष गरी भारतको नीतिको प्रत्यक्ष असर नेपाली बजारमा परेको हो । भारतले चामल निर्यात नीतिमा गरेको परिवर्तन, मौसमी प्रतिकूलताका कारण उत्पादनमा आएको कमी र धानको न्यूनतम समर्थन मूल्य बढाएकाले मूल्यमा यसको असर देखिएको सङ्घले जनाएको छ ।
चामल उद्योगी विभोर अग्रवालका अनुसार भारतले बङ्गलादेशका लागि चामल निर्यातको कोटा खोलेका कारण माग बढ्न गई मूल्यमा थप चाप परेको हो । बङ्गलादेशले आफ्नो आन्तरिक खाद्य भण्डारण बढाउन र मूल्य नियन्त्रण गर्न भारतबाट नौ लाख मेट्रिक टन चामल आयात गर्ने योजना बनाएको छ, जसको असर आपूर्ति शृङ्खलामा देखिएको छ ।
भारततर्फ निर्यात बढेपछि आकासिएको खानेतेलको मूल्य अहिले अझै बढेको छ । नेपाल खुद्रा व्यापार सङ्घका अनुसार असार १ गते प्रतिलिटर ३५० रुपियाँ रहेको काँचो तोरीको मूल्य साउन १ गतेदेखि बढेर प्रतिलिटर ३८० रुपियाँ र भुटेको तोरीको तेल प्रतिलिटर ४३० रुपियाँबाट बढेर ४६० रुपियाँ पुगेको छ । भटमास र सूर्यमुखी तेलको खुद्रा मूल्य प्रतिलिटर २९० रुपियाँसम्म पुगेको छ ।
उपभोक्तामा मन्दी
सङ्घका महासचिव अमुलकाजी तुलाधरले पछिल्लो महिनामा चामलको भाउ अस्वाभाविक रूपमा थोकमै बढेको बताउनुभयो । उहाँका अनुसार अहिले चामलको भाउ बढाउनुपर्ने अवस्था नभए पनि जेठको सुरुदेखि नै भाउ बढेको हो । उहाँले बजारमा मन्दी छाएको र उपभोक्ताले अत्यावश्यकबाहेकका सामान किन्न छाडेको अनुभव सुनाउनुभयो ।
साल्ट ट्रेडिङ कर्पोरेसनका बिक्रीवितरण प्रबन्धक प्रमुख प्रज्वल प्रधानले पछिल्ला दुई/तीन महिनायता जिरा मसिनो र बासमती चामलको मूल्य महँगो हुँदै गएको बताउनुभयो ।
Originally published on abcnews.com.np.
प्रतिक्रिया दिनुहोस्