काठमाडौं । युक्रेनका राष्ट्रपति भोलोदिमिर जेलेन्स्कीले युक्रेनी सेनाले रुसका सैन्य तथा ऊर्जा पूर्वाधारमा लामो दूरीबाट सटिक आक्रमण गरेको दाबी गरेका छन्।

जेलेन्स्कीका अनुसार सारातोभ आयल रिफाइनरी, एंगेल्स सैन्य एयरबेस र कालुगा क्षेत्रको ल्युदिनोभस्काया आयल डिपोलाई लक्षित गरी हमला गरिएको हो। साथै ब्रयान्स्क क्षेत्रमा ड्रोन भण्डारण तथा प्रक्षेपण केन्द्रमा पनि प्रहार गरिएको उनले बताएका छन्।

राष्ट्रपति जेलेन्स्कीले युक्रेनले रुसको युद्ध क्षमता कमजोर पार्ने उद्देश्यका साथ यस्ता रणनीतिक आक्रमणलाई निरन्तरता दिइरहेको उल्लेख गर्दै देशको लामो दूरीसम्म प्रहार गर्ने क्षमता विस्तार भइरहेको बताएका छन्।

यता, रुसले भने युक्रेनी आक्रमणका कारण आठ जनाको मृत्यु भएको पुष्टि गरेको छ।

दुवै पक्षबीच आक्रमण र प्रतिआक्रमण तीव्र बन्दै जाँदा रुस–युक्रेन युद्ध थप जटिल बन्दै गएको छ।

Originally published on abcnews.com.np.