एजेन्सी । अमेरिकी राष्ट्रपति डोनाल्ड ट्रम्पले इरानमाथि नयाँ सैन्य हमला टार्ने निर्णय गरेपछि कच्चा तेलको मूल्यमा सोमबार ४ प्रतिशतभन्दा बढीको गिरावट आएको छ ।

अर्कोतर्फ, सुरक्षित लगानी (सेफ हेभन) को माग बढेका कारण सुन लगायत अन्य बहुमूल्य धातुको मूल्यमा वृद्धि भएको छ।

ब्रेन्ट क्रुड ४.०८ डलर अर्थात् ४.६४ प्रतिशतले घटेर प्रति ब्यारेल ८३.८५ डलरमा झरेको छ ।

त्यस्तै, अमेरिकी वेस्ट टेक्सास इन्टरमिडिएट क्रुड ४.०१ डलर अर्थात् ४.७४ प्रतिशतको गिरावटसँगै प्रति ब्यारेल ८०.६६ डलरमा कारोबार भएको देखिएको छ ।

यसैगरी, सुनको मूल्यमा मजबुती देखिएको छ । ट्रम्पको निर्णयले मुद्रास्फीति (महँगी) र ब्याजदर सम्बन्धी चिन्ताहरू केही कम गराएपछि लगानीकर्ताहरूको आकर्षण सुरक्षित लगानीतर्फ बढेको हो ।

स्पट गोल्ड ०.७ प्रतिशतको बढोत्तरीका साथ प्रति औन्स ४,०६७.०६ डलर पुगेको छ भने अमेरिकी गोल्ड फ्युचर्स ०.९ प्रतिशतले बढेर प्रति औन्स ४,०६५.६० डलरमा कारोबार भएको छ ।

आइतबार मात्रै डोनाल्ड ट्रम्पले इरानमाथि नयाँ आक्रमणलाई तत्कालका लागि थाती राख्दै इरानको परमाणु कार्यक्रममा छिट्टै सम्झौता गर्ने र होर्मुज स्ट्रेट पुनः खोल्ने सम्भावना व्यक्त गरेका थिए ।

Originally published on abcnews.com.np.