काठमाडौं । सरकारले ८२ जना व्यक्ति तथा संस्थाबाट उठाउन बाँकी रकम ३ अर्ब ४२ करोड ९ लाख ९५ हजार ४४९ रुपैयाँ पुगेको छ । यो रकममध्ये ठूलो हिस्सा अदालती मुद्दामा अल्झिएका क्यासिनो सञ्चालक र निर्माण व्यवसायीको बक्यौता रहेको छ ।
कुमारीचोक तथा केन्द्रीय तहसील कार्यालयका प्रमुख लावन्यराज दाहालका अनुसार, उठाउन बाँकी रकममा २ अर्ब ६ करोड ५६ लाख ८८ हजार ९१२ रुपैयाँ साँवा र १ अर्ब ३५ करोड ५३ लाख ६ हजार ५३७ रुपैयाँ ब्याज छ । गत आर्थिक वर्ष २०८२/८३ मा यसमध्ये १ करोड ४२ लाख ३६ हजार रुपैयाँ मात्र असुल भएको हो ।
“ठूलो रकम मुद्दा मामिलाका कारण रोकिएको छ,” दाहालले भने, “जसबाट ठूलो रकम उठाउनुपर्ने छ, त्यही विषयमा उनीहरूले अदालतमा मुद्दा दायर गरेका छन् । अदालतबाट फैसला नआएसम्म हामी अघि बढ्न मिल्दैन ।”
क्यासिनो रोयल्टी : सबैभन्दा ठूलो बक्यौता
उठाउन बाँकी रकममध्ये सबैभन्दा ठूलो हिस्सा क्यासिनो सञ्चालकको रोयल्टी बक्यौता हो । क्यासिनो सञ्चालकहरूसँग मात्र २ अर्ब २४ करोड ६६ लाख एक हजार ७५८ रुपैयाँ उठाउन बाँकी छ ।
सरकारले नयाँ क्यासिनो नियमावली २०७० बमोजिम रोयल्टी नतिर्ने क्यासिनो बन्द गर्ने निर्णय गरेको थियो । २०७१ वैशाखमा ८ वटा क्यासिनो बन्द गरिए पनि सञ्चालकहरू सर्वोच्च अदालत गए । अदालतले अन्तरिम आदेश दिएपछि क्यासिनोहरू सञ्चालनमा छन्, तर रोयल्टी भने उठ्न सकेको छैन ।
पर्यटन विभागले रकम उठाउन नसकेपछि संस्कृति, पर्यटन तथा नागरिक उड्डयन मन्त्रालयले कुमारीचोक तथा केन्द्रीय तहसील कार्यालयलाई जिम्मा दिएको हो ।
मुख्य क्यासिनो बक्यौतादारहरू :
-
नेपाल रिक्रिएसन सेन्टर प्रा.लि. (राकेश बाधवाल) : १ अर्ब ७ करोड ६७ हजार ८५५ रुपैयाँ
-
दि फुलवारी लि., पोखरा (नुरा श्रेष्ठ, सुमी अमात्य, आयुष अमात्य, आन्टु श्रेष्ठ, गंगा अमात्य, पियुषबहादुर अमात्य र सन्जु अमात्य राजभण्डारी) : ४९ करोड ३३ लाख २८ हजार ९६४ रुपैयाँ
-
होटल याक एण्ड यती प्रा.लि. (राधेश्याम सराफ) : २३ करोड ७५ लाख रुपैयाँ
-
अन्नपूर्ण इन्टरनेशनल प्रा.लि. (नरेन्द्रलाल प्रधान, ईश्वरीप्रसाद श्रेष्ठ, कल्पदिप राई, जोत्सना बस्नेत र तप्तबहादुर विष्ट) : २३ करोड ३८ लाख ३० हजार ३५१ रुपैयाँ
-
होटल एभरेष्ट इन्टरनेसनल प्रा.लि. (मशकुर अहमद लारी) : २० करोड ७१ लाख २५ हजार रुपैयाँ
-
ह्यापी आवर प्रा.लि. (सुरेन्द्रबहादुर सिंह) : ४७ लाख ४९ हजार ५८७ रुपैयाँ
ठेकेदारको बक्यौता पनि उठ्न सकेन
सरकारले ठूला आयोजनाका ठेकेदारसँग पनि ठूलो रकम उठाउन सकेको छैन । सम्झौताबमोजिम काम नगरेपछि ठेक्का भंग गरिएका केही मुख्य बक्यौतादारहरू :
-
सप्तकोशी जलाधार निर्माण कम्पनी प्रा.लि. (पूर्व कोशी एण्ड न्यौपाने निर्माण सेवा) र पप्पु कन्ट्रक्सन प्रा.लि. (सुनिल रौनियार) : ५३ करोड ३४ लाख ४ हजार ६५० रुपैयाँ (रोल्पाको शहिदमार्ग सडक योजनाअन्तर्गत काँक्रीमैकोट सडक सुधार, आ.व. २०७३/७४)
-
पप्पु कन्स्ट्रक्सन प्रा.लि. (सुमित रौनियार) : ३ करोड ५० लाख २१ हजार १७९ रुपैयाँ (डोण्डा खोला पुल, आ.व. २०७१/७२)
-
श्री स्वस्तिक श्री विनायक कन्स्ट्रक्सन कम्पनी प्रा.लि. (गणेशप्रसाद भेटवाल, हरिवंश भेटवाल, बिजुला भेटवाल, दिलकुमारी थापा मगर, विष्णुहरि ओझा, रामेश्वर राई) : १ करोड २० लाख ८० हजार ७१९ रुपैयाँ
-
एम.एम कन्स्ट्रक्सन कम्पनी प्रा.लि. (मुकुन्दप्रसाद गौतम) : २ करोड ८८ लाख २२ हजार ४३४ रुपैयाँ (नारायणगढ–हेटौंडा सडक उपभोग दस्तुर संकलन) र अर्को एक्क ठेक्काबापत १ करोड २५ लाख २ हजार रुपैयाँ
-
सिरुवा कन्स्ट्रक्सन कम्पनी प्रा.लि. (ऋषिराम ढुंगाना, अनन्त सिंखडा, प्रशुन घिमिरे, दिनेश पौडेल, सुरेन्द्रप्रसाद फुयाल, हरिप्रसाद सुवेदी, हरिश्चन्द्र पौडेल) : ४ करोड ४५ लाख ५३ हजार ६५४ रुपैयाँ (तनहुँको मादी नदी र कास्कीको विजयपुर खोलाको पुल निर्माण)
-
नताशा निर्माण सेवा (ईश्वर रिमाल) : २ करोड ७ लाख १६ हजार ४८५ रुपैयाँ
-
के.आर. कन्स्ट्रक्सन प्रा.लि. (अभिनाश राना) : १ करोड ३५ लाख ७० हजार ८५७ रुपैयाँ
-
यादव कन्स्ट्रक्सन (मोती यादव) : १ करोड २४ लाख ९ हजार ९६३ रुपैयाँ
-
लोकप्रिय निर्माण सेवा (सुशिल कार्की, सुनिल कार्की) : १ करोड २८ लाख ११ हजार १०३ रुपैयाँ
-
पन्चुधारामाई सप्लायर्स (शंकरकुमार दाहाल) : १ करोड २५ लाख ४ हजार ६५५ रुपैयाँ
-
खड्गदेवी कन्ट्रक्सन (डिलबहादुर गुरुङ) : १ करोड ६९ लाख ९३ हजार ९२५ रुपैयाँ (दमौली–केशवटार–शुखौरा सडक)
-
वीरेन्द्रकुमार यादव (गोलबजार नगरपालिका–८) : १ करोड ९९ लाख ९९ हजार ९६९ रुपैयाँ (हाटबजार ठेक्का)
५० वर्षदेखि उठ्न नसकेको सापटी
कार्यालयको तथ्याङ्कअनुसार उठाउन बाँकी सबैभन्दा पुरानो रकम २०२५ सालको हो । ललितपुरका तारा मानन्धरले २०२५ फागुन ९ गते घर किन्न १० हजार ८० रुपैयाँ सापटी लिएका थिए । साँवा र ब्याज गरी अहिले १४ हजार १३० रुपैयाँ उठाउन बाँकी छ ।
Originally published on abcnews.com.np.
प्रतिक्रिया दिनुहोस्