काठमाडौं । जुलाई २०२६ मा प्रमुख सवारी उत्पादक कम्पनीहरूको बिक्री विवरण सार्वजनिक भएको छ । नयाँ ऊर्जा सवारी (एनईभी) बिक्रीतर्फ बीवाइडी चार लाख ११ हजार ७२ वटा यात्रुवाहक सवारी बिक्री गर्दै शीर्ष स्थानमा रहेको छ । त्यसपछि सेइक र जिली क्रमशः दोस्रो र तेस्रो स्थानमा छन् ।

चिनियाँ विद्युतीय सवारी निर्माता लिपमोटरले भने पहिलोपटक एक महिनामै एक लाखभन्दा बढी सवारी बिक्री गर्दै नयाँ उपलब्धि हासिल गरेको छ । कम्पनीले जुलाईमा एक लाख एक हजार २६७ वटा सवारी बिक्री गरेको जनाएको छ, जुन अघिल्लो वर्षको सोही अवधिको तुलनामा १०२ प्रतिशतले बढी हो ।

लिपमोटरको यो बिक्रीले चीनका प्रमुख अटो निर्माता चांगानको नयाँ ऊर्जा सवारी बिक्रीलाई समेत उछिनेको छ । जुलाईमा चांगानले ९६ हजार ५०० वटा एनईभी बिक्री गरेको थियो । लिपमोटरको बिक्री जिली समूहअन्तर्गतको लोकप्रिय ब्रान्ड जिली ग्यालेक्सीको निकै नजिक पुगेको छ । जुलाईमा जिली ग्यालेक्सीले एक लाख सात हजार ७९७ वटा सवारी बिक्री गरेको थियो ।

मार्चको अन्त्यमा सार्वजनिक गरिएको लिपमोटर ए१० (अन्तर्राष्ट्रिय बजारमा बी०३एक्स) मोडलको जुलाईमा मात्रै २८ हजार ५९३ वटा सवारी ग्राहकलाई हस्तान्तरण गरिएको छ । यो कम्पनीको कुल मासिक बिक्रीको करिब ३० प्रतिशत हो ।

बीवाइडीले जुलाईमा चार लाख ११ हजार ७२ वटा सवारी बिक्री गर्दै लगातार तेस्रो महिना वार्षिक आधारमा वृद्धि कायम राखेको छ । कम्पनीको वैदेशिक बिक्री करिब एक लाख ८० हजार पुगेको छ, जुन हालसम्मकै उच्च रहेको जनाएको छ ।

बीवाइडीअन्तर्गतको फाङ चेङ बाओ ब्रान्डले ४१ हजार २१३ वटा सवारी बिक्री गर्दै वार्षिक रूपमा १९०.६ प्रतिशतको वृद्धि हासिल गरेको छ । डेन्जा ब्रान्डले १९ हजार १९६ वटा सवारी बिक्री गर्दै ६८.८ प्रतिशतले वृद्धि गरेको छ ।

ली अटोले जुलाईमा ३० हजार ४६८ वटा सवारी बिक्री गरेको छ, जुन अघिल्लो वर्षको तुलनामा ०.९ प्रतिशतले कम हो ।

निओले जुलाईमा ३५ हजार ९३४ वटा सवारी ग्राहकलाई हस्तान्तरण गरेको छ, जुन वार्षिक रूपमा ७१ प्रतिशतले बढी हो । यसमध्ये निओ ब्रान्डका २० हजार आठवटा, ओनभोका १० हजार १५५ वटा र फायरफ्लाई ब्रान्डका पाँच हजार ७७१ वटा सवारी बिक्री भएका छन् ।

यस्तै, साओमीले जुलाईमा ३० हजारभन्दा बढी सवारी हस्तान्तरण गरेको जनाएको छ । हुवावेको हार्मोनी इन्टेलिजेन्ट मोबिलिटी एलायन्स (हाइमा) अन्तर्गत ४५ हजार ४६ वटा सवारी बिक्री भएका छन् । हुवावे र चेरीको सहकार्यमा उत्पादन हुने लक्सिड ब्रान्डले १० हजार ७०९ वटा सवारी बिक्री गर्दै अघिल्लो वर्षको तुलनामा २२७.७ प्रतिशतको उल्लेखनीय वृद्धि हासिल गरेको छ ।

Originally published on abcnews.com.np.