पोखरा । नेपाल मगर संघ, संगम इकाई समिति, पोखरा–२९ खल्याड, कास्कीको आयोजनामा सञ्चालित १५ दिने आधारभूत मगर भाषा प्रशिक्षण कार्यक्रम सम्पन्न भएको छ।

साउन १ गतेदेखि सञ्चालन भएको प्रशिक्षण शुक्रबार समापन गरिएको हो। समापन कार्यक्रममा नेपाल मगर लेखक संघका केन्द्रीय उपाध्यक्ष तथा मगर भाषा प्रशिक्षक रुद्रबहादुर श्रीसमगरले यस्ता प्रशिक्षणले मगर भाषाको संरक्षण, संवर्द्धन र पुस्तान्तरणमा महत्वपूर्ण योगदान पुग्ने बताउनुभयो।

उहाँले प्रशिक्षणमा सिकेका ज्ञानलाई दैनिक बोलचाल र व्यवहारमा प्रयोग गर्न आग्रह गर्दै घरपरिवारमै मगर भाषा प्रयोग नभएसम्म यसको संरक्षण सम्भव नहुने उल्लेख गर्नुभयो। मगर भाषाको संरक्षणका लागि राज्यसँगै समुदायको सक्रिय भूमिका आवश्यक रहेको उहाँको भनाइ थियो।

कार्यक्रममा इकाई समितिका संस्थापक अध्यक्ष तिलबहादुर सारूमगरले लोपोन्मुख बन्दै गएको मगर भाषाको संरक्षणका लागि प्रशिक्षण सञ्चालन गर्नु सकारात्मक पहल भएको बताउनुभयो। समितिका सल्लाहकार मोहनीलाल थापामगरले प्रत्येक मगर बस्तीमा यस्ता भाषा प्रशिक्षण सञ्चालन गर्नुपर्ने आवश्यकता औँल्याउनुभयो।

नेपाल मगर संघ, संगम इकाई समितिका अध्यक्ष खर्कबहादुर थापामगरको अध्यक्षतामा सम्पन्न कार्यक्रममा उपाध्यक्ष भीमा थापामगर र सहसचिव सीता आलेमगरले पनि मगर भाषाको संरक्षण र प्रवर्द्धनमा सबैको साझा प्रयास आवश्यक रहेको धारणा व्यक्त गर्नुभयो।

प्रशिक्षणमा इकाई समितिका २५ जना प्रशिक्षार्थीको सहभागिता रहेको आयोजकले जनाएको छ।

Originally published on abcnews.com.np.