स्याङ्जा । प्रदेश अस्पताल स्याङ्जामा उपचारका लागि आउने बिरामीको संख्या पछिल्लो समय उल्लेखनीय रूपमा बढेको छ। व्यवस्थापनमा सुधार र स्वास्थ्य सेवाको दायरा विस्तार भएसँगै अस्पतालप्रति नागरिकको विश्वास बढे पनि स्थायी चिकित्सक र कर्मचारीको अभावले सेवा प्रवाहमा चुनौती थपिएको छ।

पुतलीबजार नगरपालिका–३ कुमालगाउँस्थित ५० शैयाको अस्पतालमा अहिले दैनिक २०० देखि २५० जनासम्म ओपिडी सेवा लिन आउने गरेका छन् भने ५० भन्दा बढी आकस्मिक बिरामी उपचारका लागि पुग्ने गरेका छन्। मौसम परिवर्तनसँगै ज्वरो, रुघाखोकी, संक्रमणलगायतका बिरामी बढेपछि अस्पतालमा चाप बढेको हो।

अस्पताल व्यवस्थापन समितिका अध्यक्ष डिलकुमार भुजेलका अनुसार अस्पतालमा ६८ जनाको स्थायी दरबन्दी भए पनि हाल ११ जना मात्र स्थायी कर्मचारी कार्यरत छन्। कुल ९० जना कर्मचारीमध्ये ७९ जना करारमा रहेकाले अस्पतालको सेवा करार कर्मचारीकै भरमा सञ्चालन भइरहेको उनले बताए।

उनका अनुसार करार कर्मचारी बारम्बार फेरिने भएकाले अनुभवी जनशक्ति टिकाउन कठिन हुने र त्यसले सेवा प्रवाहको गुणस्तरमा समेत असर पार्ने गरेको छ।

जनशक्ति अभावका बाबजुद अस्पतालले आकस्मिक सेवा, बहिरंग (ओपिडी), मातृ तथा प्रसूति सेवा, मिर्गौला डायलासिस, आँखा, दाँत, भिडियो एक्स–रेलगायतका सेवा नियमित रूपमा सञ्चालन गर्दै आएको छ। सेवा विस्तारसँगै दक्ष जनशक्तिको आवश्यकता पनि बढ्दै गएको अस्पताल प्रशासनले जनाएको छ।

सदरमुकाम नजिकै रहे पनि सहज सडक पहुँचको अभावले बिरामी र सेवाग्राहीले थप सास्ती खेप्दै आएका छन्। पछिल्ला वर्षमा सेवा विस्तार, उपकरण व्यवस्थापन र प्रशासनिक सुधारका कारण अस्पतालप्रति सर्वसाधारणको विश्वास बढे पनि बिरामीको चापअनुसार स्थायी चिकित्सक र कर्मचारीको व्यवस्था हुन नसके सेवाको गुणस्तर कायम राख्न चुनौती हुने देखिएको छ।

Originally published on abcnews.com.np.