काठमाडौं — राष्ट्रिय प्रजातन्त्र पार्टी (राप्रपा)को महामन्त्री पदबाट बाहिरिएका डा. धवलशमशेर राणाको नेतृत्वमा नयाँ राजनीतिक दल ‘जय नेपाल पार्टी’ गठन भएको छ।

नवगठित पार्टीमा राष्ट्र, राष्ट्रियता, धर्म, संस्कृति र नागरिक बचाउ अभियानका संयोजक तथा व्यवसायी दुर्गा प्रसाईंलाई सर्वोच्च नेता बनाइएको छ।

केही समयअघि एकता गरेका राणा र प्रसाईं पक्षले नयाँ दलको नाम तय गर्न उपसमिति गठन गरेका थिए। सोही उपसमितिको सिफारिसका आधारमा पार्टीको नाम ‘जय नेपाल पार्टी’ राख्ने निर्णय गरिएको अध्यक्ष राणाले जानकारी दिएका छन्।

“उपसमितिको सिफारिसअनुसार पार्टीको नाम ‘जय नेपाल पार्टी’ राख्ने निर्णय भएको हो,” अध्यक्ष राणाले भने, “कार्यकारी अधिकारसहित म अध्यक्ष रहनेछु भने दुर्गा प्रसाईंजी सर्वोच्च नेताको भूमिकामा रहनुहुनेछ।”

उनका अनुसार तत्कालका लागि अध्यक्ष र सर्वोच्च नेताबाहेक अन्य पदाधिकारी नियुक्त गरिने छैन।

पार्टीले प्रारम्भिक चरणमा एक केन्द्रीय समिति गठन गर्ने र आवश्यकता तथा समयअनुसार अन्य नेताहरूलाई जिम्मेवारी प्रदान गर्दै संगठन विस्तार गर्ने तयारी गरेको अध्यक्ष राणाले बताएका छन्।

नयाँ दल गठनसँगै राप्रपाबाट अलग भएका राणा र प्रसाईं समूहले आगामी दिनमा आफ्नो राजनीतिक गतिविधि नयाँ पार्टीमार्फत अघि बढाउने भएका छन्।

Originally published on abcnews.com.np.