काठमाडौं — जिल्ला प्रशासन कार्यालय काठमाडौंले जिल्लाभित्र सञ्चालित होटल, रेष्टुरेन्ट तथा अन्य सार्वजनिक स्थलमा हुक्का र चुरोट सेवनलाई थप व्यवस्थित बनाउन कडाइ गर्ने भएको छ।

सहायक प्रमुख जिल्ला अधिकारी मुक्तिराम रिजालले बुधबार जारी गरेको सूचनामा प्रचलित कानुनअनुसार मात्रै धूम्रपान गर्न पाइने स्पष्ट पारिएको छ। सूचनाअनुसार धूम्रपानका लागि चारैतिरबाट बन्द गरिएको छुट्टै स्थान (Designated Smoking Area) व्यवस्था गर्नुपर्नेछ, जसबाट अन्य व्यक्तिलाई धुवाँ वा गन्धको असर नपुग्ने सुनिश्चित गर्नुपर्ने उल्लेख गरिएको छ।

प्रशासनले होटल तथा रेष्टुरेन्टहरूले धूम्रपानसम्बन्धी कानुनी व्यवस्था कडाइका साथ पालना गर्नुपर्ने भन्दै अनुगमनलाई निरन्तरता दिने जनाएको छ।

प्रशासनले जारी गरेको सूचनामा नियमविपरीत खुला रूपमा हुक्का वा चुरोट सेवन गराउन वा कानुनले तोकेका मापदण्ड उल्लंघन गरेको पाइए कानुनबमोजिम कारबाही गरिने चेतावनी दिइएको छ।

कानुनले के भन्छ ?

सुर्तीजन्य तथा मदिराजन्य पदार्थ (नियन्त्रण तथा नियमन) सम्बन्धी प्रचलित कानुनी व्यवस्थाअनुसार:

• सार्वजनिक स्थानमा धूम्रपान गर्न पाइँदैन।
• होटल, रेष्टुरेन्ट, बार वा अन्य सेवा प्रदायकले धूम्रपानका लागि छुट्टै बन्द स्थानको व्यवस्था गर्न सक्छन्।
• उक्त स्थानबाट धुवाँ अन्य क्षेत्रमा फैलिन नहुने व्यवस्था अनिवार्य गर्नुपर्छ।
• नियम उल्लंघन गर्ने व्यक्ति तथा संस्था दुवैलाई कानुनअनुसार जरिवाना वा अन्य प्रशासनिक कारबाही हुन सक्छ।

जिल्ला प्रशासन कार्यालयले व्यवसायीहरूलाई कानुनी व्यवस्था पूर्ण रूपमा पालना गर्न आग्रह गर्दै उल्लंघन गर्नेविरुद्ध अधिकतम कानुनी कारबाही गरिने चेतावनी दिएको छ।

Originally published on abcnews.com.np.