काठमाडौं — रासायनिक मल तस्करीको आरोपमा एक महिनाभन्दा बढी समयदेखि भारतको जेलमा रहेका सर्लाहीका दुई दाजुभाइ धरौटीमा रिहा भएका छन्।

भारतको बिहार राज्यस्थित सीतामढी जिल्लाको डुमरा जिल्ला अदालतले बुधबार सर्लाहीको बलरा नगरपालिका–५ निवासी ५५ वर्षीय सुरेशप्रसाद सिंह र ६० वर्षीय नागेन्द्रप्रसाद सिंहलाई धरौटीमा रिहा गर्न आदेश दिएको हो।

सहयोगी विशेष न्यायाधीश अखिलेश कुमार झाको एकल इजलासले दुवै जनालाई धरौटीमा रिहा गर्ने आदेश दिएको अदालत स्रोतले जनाएको छ।

दुवै दाजुभाइलाई गत जुलाई १ मा भारत–नेपाल सीमावर्ती भारतीय सहर सोनवर्षाबाट नेपाल फर्किने क्रममा भारतको सशस्त्र सीमा बल (एसएसबी) र भारतीय कृषि विभागको संयुक्त टोलीले पक्राउ गरेको थियो।

उनीहरूको साथबाट दुई बोरा युरिया र छ बोरा डीएपी मल बरामद भएपछि रासायनिक मल तस्करीको आरोपमा नियन्त्रणमा लिइएको थियो।

पक्राउ परेका दुवै जनाले भने उक्त मल कुनै व्यावसायिक प्रयोजनका लागि नभई आफ्नै खेतमा प्रयोग गर्न नेपाल ल्याउन लागेको दाबी गरेका थिए।

अदालतले धरौटीमा रिहा गर्न आदेश दिएसँगै उनीहरू जेलमुक्त भएका छन्। मुद्दाको अन्तिम सुनुवाइ भने अदालतमा जारी रहने जनाइएको छ।

Originally published on abcnews.com.np.