काठमाडौं। संघीय संसद्अन्तर्गत प्रतिनिधिसभाको बैठक आज बिहान ११ बजे बस्दैछ। बैठकमा विनियोजन विधेयक, २०८३ माथिको छलफलका क्रममा सांसदहरूले उठाएका प्रश्नहरूको सम्बन्धित मन्त्रीहरूले जवाफ तथा स्पष्टीकरण दिने कार्यसूची रहेको छ।

संसद् सचिवालयका अनुसार युवा तथा खेलकुद, श्रम तथा रोजगार, उद्योग, वाणिज्य तथा आपूर्ति, कृषि तथा पशुपन्छी विकास, वन तथा वातावरण तथा सञ्चार तथा सूचना प्रविधि मन्त्रालयसँग सम्बन्धित बजेट शीर्षकमा उठेका जिज्ञासाको मन्त्रीहरूले जवाफ दिनेछन्।

त्यस्तै, संस्कृति, पर्यटन तथा नागरिक उड्डयन मन्त्रालयअन्तर्गतका बजेट शीर्षकमा भएको छलफलका क्रममा उठेका प्रश्नको पनि सम्बोधन गरिनेछ।

यसैगरी स्वास्थ्य तथा जनसङ्ख्या मन्त्रालय, भूमि व्यवस्था, सहकारी तथा गरिबी निवारण मन्त्रालय, सङ्घीय मामिला तथा सामान्य प्रशासन मन्त्रालय तथा महिला, बालबालिका तथा ज्येष्ठ नागरिक मन्त्रालयका कार्यक्रम र बजेट शीर्षकबारे सांसदहरूले उठाएका प्रश्नको सम्बन्धित मन्त्रीहरूले स्पष्टीकरण दिने कार्यसूची छ।

हाल प्रतिनिधिसभामा आर्थिक वर्ष २०८३/८४ का लागि प्रस्तुत विनियोजन विधेयकमाथि मन्त्रालयगत छलफल जारी रहेको छ। मन्त्रीहरूको जवाफपछि सम्बन्धित मन्त्रालयका बजेट शीर्षकमाथि निर्णय प्रक्रिया अघि बढाइनेछ।

Originally published on abcnews.com.np.