सर्लाही । लखन्देही खोलाको बाँध भत्किएपछि आएको बाढीले सर्लाहीको मलङ्गवा नगरपालिका र कौडेना गाउँपालिकामा करिब १,५०० बिघा धानबाली डुबानमा परेको छ। बाढीले केही बस्ती, घर तथा गोठसमेत प्रभावित भएका छन्।

गत सोमबार राति कौडेना–५ छपकैयामा बाँध भत्किएपछि बाढी खेतमा पसेको हो। बाढीका कारण छपकैयामा ८०० बिघा, मलङ्गवा–६ खुटौनामा ५०० बिघा र मलङ्गवा–५ भाडसरमा ३०० बिघा धानबाली डुबानमा परेको स्थानीयले बताएका छन्।

स्थानीयका अनुसार विगत १५ वर्षदेखि हरेक वर्ष बर्खायाममा यस्तै डुबानको समस्या दोहोरिँदै आएको छ। पानी निकासको उचित व्यवस्था नहुँदा र बाँध निर्माणमा पर्याप्त अध्ययन नगरिँदा समस्या झन् बढेको उनीहरूको गुनासो छ।

चार दिनदेखि डुबानमा परेका भर्खरै रोपिएका धानबाली नष्ट भएपछि किसान चिन्तित बनेका छन्। पुनः रोपाइँ गर्न आवश्यक बीउ र ब्याडसमेत नभएकाले उनीहरू थप समस्यामा परेका छन्।

स्थानीय जनप्रतिनिधिहरूले लखन्देही खोलाको धार परिवर्तन र कमजोर तटबन्धका कारण हरेक वर्ष कटान तथा डुबान हुने गरेको बताएका छन्। दीर्घकालीन समाधानका लागि ठूलो बजेटसहित व्यवस्थित तटबन्ध निर्माण आवश्यक रहेको उनीहरूको भनाइ छ।

बाढीका कारण सदरमुकाम मलङ्गवाबाट भाडसर र खुटौनासम्मको आवतजावत प्रभावित भएको छ। नेपाली सेना, नेपाल प्रहरी र सशस्त्र प्रहरीले अस्थायी तटबन्ध निर्माणको प्रयास गरे पनि सफल हुन सकेको छैन। प्रतिनिधिसभा सदस्य रविन महतोले प्रभावित किसानलाई क्षतिपूर्ति उपलब्ध गराउन पहल गर्ने प्रतिबद्धता जनाएका छन्।

Originally published on abcnews.com.np.