काठमाडौं । इरानका नयाँ सर्वोच्च नेता मोजतबा खामेनीईको भिडियो सार्वजनिक भएको छ । अमेरिका–इजरायलको आक्रमणपछि पहिलोपटक उनी सार्वजनिक भिडियोमा देखिएका हुन् ।

इरानी समाचार एजेन्सी मेहरले सार्वजनिक गरेको भिडियोमा मोजतबा केही मानिससँग भुइँमा बसेर कुराकानी गरिरहेको देखिन्छ । सर्वोच्च नेता बनेपछि सार्वजनिक भएको यो उनको पहिलो भिडियो भएको बताइएको छ ।

यद्यपि, उक्त भिडियो कहिले रेकर्ड गरिएको हो भन्नेबारे मेहरले कुनै जानकारी दिएको छैन । पछिल्ला केही दिनदेखि मोजतबाको स्वास्थ्य अवस्थालाई लिएर विभिन्न अड्कलबाजी भइरहेका थिए ।

इजरायली च्यानल–१४ ले मोजतबाको अवस्था गम्भीर रहेको र उनलाई अस्पताल भर्ना गरिएको दाबी गरेको थियो । च्यानलले उनको छिट्टै मृत्यु हुन सक्ने दाबीसहितको समाचारसमेत प्रसारण गरेको थियो । तर, उनको वास्तविक स्वास्थ्य अवस्थाबारे स्वतन्त्र रूपमा पुष्टि हुने स्पष्ट जानकारी सार्वजनिक भएको छैन ।

यसैबीच, साउदी मिडिया अल–हदथले इजरायली सुरक्षा स्रोतलाई उद्धृत गर्दै मोजतबा हाल इरानमा नरहेको दाबी गरेको थियो । मोजतबाका नाममा जारी हुने सरकारी सन्देशहरू इस्लामिक रिभोलुसनरी गार्ड कर्प्सका प्रमुख अहमद वाहिदी तथा अन्य वरिष्ठ अधिकारीहरूले तयार पारिरहेको दाबीसमेत उक्त रिपोर्टमा गरिएको थियो ।

सर्वोच्च नेता बनेयता मोजतबा सार्वजनिक रूपमा देखिएका थिएनन् । उनले कुनै सार्वजनिक भाषणसमेत दिएका छैनन् । सरकारी सञ्चारमाध्यमले भने उनका नाममा लिखित सन्देशहरू मात्र सार्वजनिक गर्दै आएका छन् ।

इरानी सञ्चारमाध्यमका अनुसार, आफ्ना पिता आयातोल्लाह अली खामेनीईको मृत्युपछि मोजतबाले कुनै मन्त्रीसँग प्रत्यक्ष भेट गरेका छैनन् । उनी पिताको अन्त्येष्टिमा समेत सार्वजनिक रूपमा देखिएका थिएनन् । राष्ट्रपति मसुद पेजेश्कियनले पनि मोजतबासँग प्रत्यक्ष सम्पर्क गर्न कठिन भइरहेको बताएका थिए ।

मोजतबाको स्वास्थ्य अवस्थाबारे यसअघि पनि विभिन्न दाबी सार्वजनिक हुँदै आएका थिए । पछिल्लो भिडियो सार्वजनिक भएपछि भने उनको स्वास्थ्य र सार्वजनिक गतिविधिबारे पुनः चासो बढेको छ । यद्यपि, भिडियोको रेकर्डिङ मिति तथा उनको वर्तमान अवस्थाबारे स्वतन्त्र पुष्टि हुन बाँकी छ ।

Originally published on abcnews.com.np.