काठमाडौं । चीनमा समुद्री आँधी ‘टाइफुन डल्फिन’को प्रभाव बढेसँगै सांघाईका दुई प्रमुख विमानस्थलबाट १ हजार ३०० भन्दा बढी उडान रद्द गरिएको छ।

आँधी र भारी वर्षाको जोखिमलाई ध्यानमा राख्दै झेजियाङ प्रान्तमा करिब ३ लाख ९० हजार मानिसलाई सुरक्षित स्थानमा सारिएको छ। सांघाईका होङकियाओ र पुडोङ विमानस्थलबाट आइतबारका लागि निर्धारित उडानमध्ये करिब ६० प्रतिशत रद्द गरिएको हो।

चीनको मौसम विभागले आगामी दिनमा भारी वर्षा, बाढी र पहिरोको जोखिम रहेको चेतावनी दिएको छ। विशेषगरी तटीय क्षेत्रमा तीव्र हावाहुरी र भारी वर्षा हुन सक्ने बताइएको छ।

‘टाइफुन डल्फिन’ शनिबार उत्तरी ताइवान पुगेको थियो। त्यसको प्रभावले राजधानी ताइपेईसहित विभिन्न क्षेत्रमा भारी वर्षा भएको थियो। आँधीका कारण ताइवानका केही एयरलाइन्सले चीनका लागि आइतबार निर्धारित उडानसमेत रद्द गरेका छन्।

आइतबार बिहानसम्म आँधीको अधिकतम निरन्तर हावाको गति करिब १६२ किलोमिटर प्रतिघण्टा मापन गरिएको थियो। मौसम पूर्वानुमानअनुसार आँधी आइतबार राति झेजियाङ र छिमेकी फुजियान प्रान्तको उत्तरी क्षेत्रमा पुग्न सक्ने सम्भावना छ।

चिनियाँ मौसमविद्हरूले प्रभावित क्षेत्रमा आगामी केही दिनमा २०० देखि ४०० मिलिमिटरसम्म वर्षा हुन सक्ने अनुमान गरेका छन्। झेजियाङ प्रशासनले भारी वर्षासँगै पहिरोको गम्भीर जोखिम रहेको भन्दै सतर्कता अपनाउन आग्रह गरेको छ।

झेजियाङमा ३ लाख ९० हजार मानिस सुरक्षित स्थानमा सारिए

आँधीको सम्भावित प्रभावलाई ध्यानमा राख्दै झेजियाङको ताइझोउ सहरमा शनिबार साँझ करिब ३ लाख ९० हजार मानिसलाई सुरक्षित स्थानमा सारिएको थियो।

सांघाईमा पनि जोखिमयुक्त क्षेत्रबाट ३० हजारभन्दा बढी मानिसलाई सुरक्षित स्थानमा स्थानान्तरण गरिएको छ। प्रशासनले समुद्री गतिविधिमा समेत रोक लगाएको छ।

झेजियाङमा फेरी, क्रुजलगायत सबै जलआधारित गतिविधि निलम्बन गरिएको छ।

Originally published on abcnews.com.np.