प्रिस्टिना । कोसोभोको संसद्मा विपक्षी सांसदले कार्यवाहक प्रधानमन्त्री आल्बिन कुर्तीमाथि अण्डा प्रहार गरेपछि शनिबारको संसदीय बैठक स्थगित भएको छ।

‘एलाइन्स फर द फ्युचर अफ कोसोभो’की सांसद टाइम काद्रियाजले संसद् बैठक चलिरहेका बेला कुर्तीतर्फ अघि बढेर अण्डा प्रहार गरेकी हुन्। सुरक्षाकर्मी र अन्य सांसदहरूले उनलाई रोक्ने प्रयास गरेका थिए। त्यसक्रममा उनले कुर्तीप्रति आक्रोश व्यक्त गर्दै ‘धिक्कार छ तिमीलाई!’ भन्दै चिच्याएकी थिइन्।

घटनापछि सुरक्षाकर्मीले कुर्तीलाई घेरेर सुरक्षा दिएका थिए भने सभामुखले संसद्को प्रत्यक्ष प्रसारण रोक्न निर्देशन दिएका थिए। काद्रियाजले भने घटनाको भिडियो सामाजिक सञ्जालमा सार्वजनिक गरेकी छन्।

जुन ७ मा भएको संसदीय निर्वाचनपछि नयाँ सरकार गठनका लागि दलहरूबीच सहमति जुट्न नसकिरहेका बेला संसद्मा यस्तो घटना भएको हो। कुर्ती नेतृत्वको ‘भेतेभेन्दोस्जे’ पार्टीले १२० सदस्यीय संसद्मा ५३ सिट जितेर सबैभन्दा ठूलो दल बने पनि सरकार गठनका लागि आवश्यक बहुमत भने जुटाउन सकेको छैन।

सरकार गठनका विषयमा कुर्तीको पार्टी र विपक्षी दलहरूबीच लामो समयदेखि छलफल जारी रहे पनि ठोस सहमति हुन सकेको छैन। यसैबीच राष्ट्रपति चयन र सभामुखको उम्मेदवारीलाई लिएर विवाद थप चर्किएको छ।

कोसोभोमा पछिल्लो समय राजनीतिक अस्थिरता बढ्दै गएको छ। दुई वर्षभन्दा कम अवधिमा तीनपटक निर्वाचन भइसके पनि स्पष्ट बहुमतसहितको सरकार बन्न नसक्दा राजनीतिक गतिरोध कायमै छ।

१८ सिट जितेको ‘डेमोक्र्याटिक लिग अफ कोसोभो’ सम्भावित गठबन्धनका लागि महत्वपूर्ण साझेदार मानिएको छ। त्यस्तै, अर्को विपक्षी दल ‘कोसोभो डेमोक्र्याटिक पार्टी’ले २२ सिट जितेको छ। तर कुर्ती र विपक्षी दलका नेताबीच भएका छलफलले अहिलेसम्म सरकार गठनको निकास दिन सकेको छैन।

शनिबार संसद्मा भएको अण्डा प्रहारको घटनाले कोसोभोको राजनीतिक विवाद झन् तनावपूर्ण बन्दै गएको संकेत गरेको छ।