काठमाडौं । देशभर मनसुनी गतिविधि सक्रिय रहेकाले आज पनि अधिकांश भूभागमा वर्षाको सम्भावना रहेको जल तथा मौसम विज्ञान विभागअन्तर्गतको मौसम पूर्वानुमान महाशाखाले जनाएको छ।

महाशाखाका अनुसार सोमबार बिहान ८ बजेसम्म देशभर साधारणतया बदली रहेको छ। बागमती, गण्डकी, लुम्बिनी र सुदूरपश्चिमका केही स्थान तथा कोसी, मधेस र कर्णालीका थोरै स्थानमा हल्कादेखि मध्यम वर्षा भइरहेको छ।

दिउँसो कहाँ-कहाँ वर्षा?

दिउँसो देशभर साधारणतया बदली रहनेछ। हिमाली भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।

पहाडी भूभागका धेरै स्थानमा मध्यमसम्म वर्षा हुनसक्ने महाशाखाले जनाएको छ। कोसी, लुम्बिनी र सुदूरपश्चिमका तराईका केही तथा मधेस, बागमती र गण्डकीका तराईका थोरै स्थानमा मेघगर्जन र चट्याङसहित मध्यम वर्षाको सम्भावना छ।

कोसी, बागमती र गण्डकीका हिमाली तथा पहाडी भूभाग, कर्णाली र सुदूरपश्चिमका पहाडी भूभाग तथा लुम्बिनीका पहाडी र तराई क्षेत्रमा एक–दुई स्थानमा भारी वर्षा हुनसक्ने पूर्वानुमान छ।

राति पनि वर्षा कायमै रहने

सोमबार राति पनि देशभर साधारणतया बदली रहनेछ। हिमाली भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।

पहाडी भूभागका साथै बागमती, गण्डकी, लुम्बिनी र सुदूरपश्चिमका तराई क्षेत्रमा धेरै स्थानमा मेघगर्जन र चट्याङसहित मध्यम वर्षा हुनसक्नेछ।

त्यस्तै, कोसी र बागमती तथा गण्डकीका हिमाली–पहाडी भूभागका एक–दुई स्थानमा, कर्णालीका हिमाली–पहाडी क्षेत्र तथा लुम्बिनी र सुदूरपश्चिमका पहाडी–तराई क्षेत्रमा थोरै स्थानमा भारी वर्षाको सम्भावना छ। केही स्थानमा धेरै भारी वर्षासमेत हुनसक्ने महाशाखाले जनाएको छ।

काठमाडौं उपत्यकामा पनि वर्षा

काठमाडौं उपत्यकामा बिहानैदेखि निरन्तर वर्षा भइरहेको छ। मौसमविद् रोजन लामिछानेका अनुसार उपत्यकाका अधिकांश स्थानमा पछिल्लो करिब ६ घण्टादेखि हल्का वर्षा भइरहेको थियो।

उनका अनुसार बिहान ८/९ बजेपछि केही समय मौसममा सुधार देखिए पनि दिउँसो पुनः वर्षा हुने सम्भावना छ। दिउँसो उपत्यकामा मध्यमसम्म वर्षा हुनसक्ने र वर्षा निरन्तर भए केही स्थानमा भारी वर्षासमेत हुनसक्ने उनले बताएका छन्।

कति वर्षालाई हल्का, मध्यम र भारी भनिन्छ?

मौसमविद्का अनुसार २४ घण्टामा:

• १० मिलिमिटरभन्दा कम वर्षा — हल्का
• १० देखि ५० मिलिमिटरसम्म — मध्यम
• ५० देखि १०० मिलिमिटरसम्म — भारी
• १०० देखि २०० मिलिमिटरसम्म — धेरै भारी
• २०० मिलिमिटरभन्दा बढी — अति भारी वर्षा

भनिन्छ।

त्यस्तै, वर्षाको सम्भावना जनाउँदा एक–दुई स्थान भन्नाले १० प्रतिशतभन्दा कम भूभाग, थोरै स्थान भन्नाले १०–३० प्रतिशत, केही स्थान भन्नाले ३०–५० प्रतिशत, धेरै स्थान भन्नाले ५०–८० प्रतिशत र अधिकांश स्थान भन्नाले ८० प्रतिशतभन्दा बढी भूभागमा वर्षा हुने सम्भावना बुझिन्छ।

Originally published on abcnews.com.np.