काठमाडौं — कानून, न्याय तथा संसदीय मामिलामन्त्री सोविता गौतमले लोकतन्त्रलाई सुदृढ बनाउन र नागरिकलाई राज्यका कामकारबाहीबारे सुसूचित गराउन मातृभाषामा गरिने पत्रकारिताको भूमिका महत्वपूर्ण रहेको बताएकी छन्।

सोमबार काठमाडौंमा आयोजित तेस्रो अन्तर्राष्ट्रिय मातृभाषा पत्रकारिता सम्मेलनलाई सम्बोधन गर्दै मन्त्री गौतमले नेपालको इतिहास, सभ्यता र संस्कृति संरक्षणमा आदिवासी तथा विभिन्न समुदायले पुर्‍याएको योगदानको प्रशंसा गरिन्।

अन्तर्राष्ट्रिय आदिवासी दिवसको सन्दर्भमा आयोजित सम्मेलनमा उनले राज्यका कामकारबाही तथा सार्वजनिक सूचना हरेक नागरिकले आफ्नै मातृभाषामा बुझ्न पाउनु लोकतन्त्रको महत्वपूर्ण पक्ष भएको बताइन्।

‘नेपालको पहिचान र इतिहास केवल सरकारी दस्तावेजमा मात्र सीमित छैन, यो हाम्रो संस्कार, संस्कृति, रहनसहन र भाषाहरूमा जीवित छ,’ उनले भनिन्, ‘नेपालको बहुजातीय र बहुभाषिक विविधतालाई जोगाउनु सबै नेपालीको साझा दायित्व हो।’

राज्य र नागरिकबीच रहेको सूचनाको दूरी कम गर्न पत्रकारहरूको भूमिका महत्वपूर्ण हुने उनको भनाइ थियो। उनले मिथिला क्षेत्रदेखि राउटे समुदायसम्मका हरेक नागरिकले राज्यका गतिविधि र निर्णयबारे जानकारी पाउने वातावरण बनाउनुपर्नेमा जोड दिइन्।

‘जब नागरिकले आफ्नै आमाले सिकाएको भाषामा राज्यका सूचनाहरू प्राप्त गर्छन्, तब मात्र लोकतन्त्र वास्तविक अर्थमा बलियो हुन्छ,’ मन्त्री गौतमले भनिन्।

भाषा संरक्षणका लागि त्यसलाई घर र समुदायमा मात्र सीमित नराखी सञ्चारमाध्यममार्फत निरन्तर प्रयोगमा ल्याउनुपर्ने उनले बताइन्।

‘भाषा केवल घर वा समुदायमा बोलेर मात्र जोगिँदैन, यसलाई सञ्चारमाध्यमका माध्यमबाट प्रयोगमा ल्याउँदा मात्र जीवन्त राख्न सकिन्छ। भाषा बाँच्नु भनेको हाम्रो सभ्यता र पुर्खाको ज्ञान बाँच्नु हो,’ उनले भनिन्।

मन्त्री गौतमले मातृभाषामा पत्रकारिता गर्ने सञ्चारकर्मीहरूले भोग्दै आएका समस्या र चुनौतीप्रति सरकार सकारात्मक रहेको बताइन्। यस क्षेत्रको विकास र प्रवर्द्धनका लागि आवश्यक कामबारे ठोस प्रस्ताव सरकारसमक्ष पेश गर्न उनले पत्रकारहरूलाई आग्रह गरिन्।

भाषा संरक्षणसँगै मातृभाषाका पत्रकारको वृत्तिविकास र क्षमता अभिवृद्धिका लागि सरकार प्रतिबद्ध रहेको उनको भनाइ थियो।

अन्तर्राष्ट्रिय सम्मेलनले विभिन्न देशमा मातृभाषा पत्रकारिताका क्षेत्रमा भइरहेका अभ्यास, उपलब्धि र चुनौतीबारे अनुभव आदानप्रदान गर्ने अवसर प्रदान गर्ने उनले बताइन्। यस्ता अनुभवले नेपालमा मातृभाषा पत्रकारिताको विकासका लागि आवश्यक नीति तथा कार्यक्रम तय गर्न सरकारलाई समेत मार्गनिर्देशन गर्ने उनको अपेक्षा थियो।

विभिन्न देशका प्रतिनिधि, राजनीतिक दलका नेता तथा सञ्चारकर्मीको सहभागिता रहेको सम्मेलनले मातृभाषामा हुने पत्रकारितालाई थप सशक्त र प्रभावकारी बनाउँदै नयाँ उचाइमा पुर्‍याउने विश्वाससमेत मन्त्री गौतमले व्यक्त गरिन्।

Originally published on abcnews.com.np.