काठमाडौं । सत्तारूढ राष्ट्रिय स्वतन्त्र पार्टी (रास्वपा)की सांसद लिमा अधिकारी आचार्यले खाना पकाउने ग्यासको अभावका कारण सर्वसाधारणले भोगिरहेको समस्या तत्काल समाधान गर्न सरकारसँग माग गरेकी छन्।

सोमबार साउन २५ गते बसेको प्रतिनिधिसभा बैठकमा बोल्दै सांसद अधिकारीले ग्यासका लागि नागरिकले खाली सिलिन्डर बोकेर मध्यरातसम्म लाइनमा बस्नुपर्ने अवस्था सरकारको गैरजिम्मेवारीपन भएको टिप्पणी गरिन्।

उनले एकातिर देशमा उत्पादित विद्युत् खेर गइरहेको र अर्कोतर्फ खाना पकाउने ग्यासका लागि नागरिकले घण्टौँ लाइनमा बस्नुपर्ने अवस्था विडम्बनापूर्ण भएको बताइन्।

ग्यास आपूर्तिमा पटक–पटक समस्या देखिँदै आएकाले सरकारले वैकल्पिक ऊर्जाको प्रयोगलाई प्राथमिकता दिनुपर्ने उनको भनाइ छ। नागरिकलाई ग्यासको अभावबाट राहत दिन तत्काल इन्डक्सन चुलो वितरण गर्ने योजना ल्याउन उनले सरकारसँग माग गरिन्।

विद्युतीय चुलोको प्रयोग सहज र सुलभ बनाउनुपर्नेमा जोड दिँदै अधिकारीले विद्युत् खपत बढाउने नाममा बनाइएका नीतिले वैकल्पिक इन्धनको प्रयोगलाई निरुत्साहित गरिरहेको भए त्यसबारे समेत सरकारले पुनर्विचार गर्नुपर्ने बताइन्।

‘यदि ग्यासको यो सास्तीबाट नागरिकलाई साँच्चिकै राहत दिने हो भने अब ग्यास सिलिन्डरको लाइन होइन, इन्डक्सन चुलो बाँड्ने योजना सरकारले तत्काल ल्याओस्,’ उनले भनिन्।

उनले नागरिकको भान्सा सहज बनाउने विषयलाई सरकारले तत्काल प्राथमिकतामा राख्नुपर्नेमा जोड दिइन्।

Originally published on abcnews.com.np.