काठमाडौं । सरकारले आज प्रतिनिधिसभा बैठकमा तीन वटा महत्वपूर्ण विधेयक प्रस्तुत गरेको छ। कर्मचारी सञ्चय कोष, मेलमिलाप प्रक्रिया तथा बालश्रमसम्बन्धी कानुनी व्यवस्थालाई परिमार्जन गर्ने उद्देश्यसहित तीन विधेयक सदनमा पेस गरिएको हो।
अर्थमन्त्री डा. स्वर्णिम वाग्लेले ‘कर्मचारी सञ्चय कोष (दशौँ संशोधन) विधेयक, २०८३’ प्रतिनिधिसभामा पेस गरे।
त्यस्तै, कानुन, न्याय तथा संसदीय मामिलामन्त्री सोविता गौतमले ‘मेलमिलापसम्बन्धी (दोस्रो संशोधन) विधेयक, २०८३’ प्रस्तुत गरिन्। उनका अनुसार प्रस्तावित संशोधनले विवाद समाधानका लागि खटिने मेलमिलापकर्ताको संख्या निर्धारण गर्ने प्रक्रियालाई थप सरल बनाउनेछ।
विधेयकले मेलमिलाप समन्वय समितिको संरचनालाई प्रदेश र जिल्लास्तरसम्म विस्तार गर्ने प्रस्तावसमेत गरेको छ। त्यसअनुसार प्रदेश मेलमिलाप समन्वय समिति र जिल्ला मेलमिलाप समन्वय समिति गठन गरिने व्यवस्था प्रस्ताव गरिएको छ।
मन्त्री गौतमले मेलमिलाप प्रक्रियालाई थप छरितो र प्रभावकारी बनाउँदै अदालतमा पुग्ने विवाद तथा मुद्दाको चाप घटाउन विधेयक महत्वपूर्ण हुने बताइन्।
यसैगरी युवा, श्रम तथा रोजगारमन्त्री रामजी यादवले ‘बालश्रम (निषेध तथा नियमित गर्ने) विधेयक, २०८३’ प्रतिनिधिसभामा पेस गरेका छन्।
मन्त्री यादवका अनुसार विधेयकले बालश्रमलाई प्रभावकारी रूपमा निषेध गर्दै बालबालिकालाई शिक्षा तथा सीप विकासका अवसरमा सहभागी गराउने उद्देश्य राखेको छ।
सरकारले यी विधेयकमार्फत सार्वजनिक सेवासँग सम्बन्धित संस्थागत व्यवस्थामा सुधार, विवाद समाधान प्रक्रियाको प्रभावकारिता वृद्धि तथा बालअधिकार संरक्षणलाई कानुनी रूपमा थप बलियो बनाउने लक्ष्य लिएको जनाएको छ।
Originally published on abcnews.com.np.
प्रतिक्रिया दिनुहोस्