काठमाडौं । प्रधानमन्त्री वालेन्द्र शाह ‘बालेन’ र नेपालका लागि चिनियाँ राजदूत झाङ माओमिङबीच सोमबार शिष्टाचार भेटवार्ता भएको छ।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा नेपाल–चीन सम्बन्धलाई थप सुदृढ बनाउने, विभिन्न क्षेत्रमा सहयोग विस्तार गर्ने तथा विकास साझेदारीलाई प्रभावकारी बनाउने विषयमा छलफल भएको प्रधानमन्त्रीको सचिवालयले जनाएको छ।

भेटमा प्रधानमन्त्री शाहले चीनसँग नेपालको ऐतिहासिक सम्बन्धलाई थप प्रगाढ बनाउँदै साझा हितका क्षेत्रमा सहकार्य गर्नुपर्नेमा जोड दिएका थिए।

चिनियाँ राजदूत माओमिङले प्रधानमन्त्री शाहलाई शुभकामना दिँदै दुई देशबीचको आपसी सम्बन्ध तथा सहकार्यलाई थप मजबुत बनाउने प्रतिबद्धता व्यक्त गरेको सचिवालयले जनाएको छ।

प्रधानमन्त्री नियुक्त भएपछि शाहले यसअघि राजदूत तथा विभिन्न कूटनीतिक नियोगका प्रमुखसँग सामूहिक भेटवार्ता गरेका थिए। चैत २५ गते भएको उक्त भेटमा कूटनीतिक नियोगका प्रमुखहरूले प्रधानमन्त्री शाहलाई बधाई तथा सफल कार्यकालको शुभकामना दिएका थिए।

यसअघि विदेशी कूटनीतिज्ञसँग छुट्टाछुट्टै भेट नगर्ने योजनामा रहेका प्रधानमन्त्री शाहले पछिल्लो समय भने उच्च विदेशी प्रतिनिधिसँग एक्लाएक्लै भेटवार्ता गर्न थालेका छन्। असार २३ गते उनले एसियाली विकास बैंकका अध्यक्ष मासातो कान्दासँग भेटवार्ता गरेका थिए।

सोमबार प्रधानमन्त्री शाहले भारतीय र चिनियाँ राजदूतसँग छुट्टाछुट्टै भेटवार्ता गरेका छन्। मंगलबार अमेरिकी दूतावासका उच्च अधिकारीसँग भेटवार्ता गर्ने कार्यक्रमसमेत तय भएको जनाइएको छ।

Originally published on abcnews.com.np.