काठमाडौं । नाइमा नेपाल मोबिलिटी एक्स्पो–२०२६ मा एमजीको प्रिमियम इलेक्ट्रिक पिकअप ‘यूनाइन’ सार्वजनिक गरिएको छ। नेपालका लागि एमजीको आधिकारिक वितरक प्यारामाउन्ट मोटर्सले उक्त विद्युतीय पिकअप नेपाली बजारमा सार्वजनिक गरेको हो।

आधुनिक डिजाइन, उच्च क्षमताको ब्याट्री तथा प्रिमियम सुविधासहितको ‘यूनाइन’ बजारमा आएसँगै नेपालमा विद्युतीय पिकअप सेग्मेन्टमा प्रतिस्पर्धा थप बढ्ने अपेक्षा गरिएको छ। विद्युतीय सवारीसाधनप्रति नेपाली उपभोक्ताको बढ्दो आकर्षणलाई लक्षित गर्दै एमजी यूनाइनले प्रिमियम पिकअप बजारमा नयाँ विकल्प प्रस्तुत गर्ने कम्पनीको दाबी छ।

प्यारामाउन्ट मोटर्सले नाइमा मोबिलिटी एक्स्पोको हल ‘बी’, स्टल नम्बर एल–२ मा एमजी यूनाइन प्रदर्शनीमा राखेको जनाएको छ।

एमजी यूनाइनमा १०२.२ किलोवाट–आवरको एलएफपी ब्याट्री जडान गरिएको छ। कम्पनीका अनुसार यसले एकपटक पूर्ण चार्ज गर्दा डब्लुएलटीपी मापदण्डअनुसार ४३० किलोमिटरसम्मको रेन्ज प्रदान गर्छ।

यसमा ३२५ किलोवाट क्षमताको डुअल मोटर जडान गरिएको छ। डीसी फास्ट चार्जिङमार्फत ब्याट्रीलाई १० देखि ८० प्रतिशतसम्म चार्ज गर्न करिब १० मिनेट लाग्ने कम्पनीको दाबी छ। यसको अधिकतम गति १८० किलोमिटर प्रतिघण्टा रहेको छ।

यूनाइनको लम्बाइ ५ हजार ५०० मिलिमिटर, चौडाइ १ हजार ९९७ मिलिमिटर र उचाइ १ हजार ८६० मिलिमिटर छ। ३ हजार ३०० मिलिमिटर ह्वीलबेस रहेको यस पिकअपमा २२० मिलिमिटर ग्राउन्ड क्लियरेन्स र २० इन्चका पाङ्ग्रा छन्। डबल–क्याब पिकअपको पेलोड क्षमता १ हजार १०० किलोग्राम रहेको कम्पनीले जनाएको छ।

एमजी यूनाइनमा १२.३ इन्चको इन्फोटेन्मेन्ट स्क्रिन, आठ स्पिकरसहितको जेबीएल अडियो सिस्टम र ६४ रङको एम्बियन्ट लाइटिङ उपलब्ध छ।

फ्ल्यागशिप भेरियन्टमा चालकको सिटमा आठ–वे इलेक्ट्रिक एडजस्टमेन्ट, भेन्टिलेसन, मसाज तथा मेमोरी फङ्सनलगायतका सुविधा उपलब्ध छन्। यसले पिकअपलाई व्यावसायिक प्रयोजनसँगै व्यक्तिगत तथा लाइफस्टाइल प्रयोगका लागि पनि लक्षित गरिएको देखिन्छ।

सुरक्षाका लागि यूनाइनमा ३६० डिग्री एचडी क्यामेरा, एडाप्टिभ क्रुज कन्ट्रोल, अटोनोमस इमर्जेन्सी ब्रेकिङ र लेन किप असिस्टलगायतका एडभान्स्ड ड्राइभर असिस्टेन्स सिस्टम (एडीएएस) उपलब्ध छन्।

एमजी यूनाइनमा भी२एल (भेहिकल–टु–लोड) प्रविधि पनि उपलब्ध छ। यसमार्फत गाडीको ब्याट्रीबाट विभिन्न विद्युतीय उपकरण सञ्चालन गर्न सकिन्छ।

उच्च ग्राउन्ड क्लियरेन्स, ठूलो पेलोड क्षमता र विद्युतीय ड्राइभट्रेनका कारण यूनाइनले नेपाली बजारमा व्यक्तिगत प्रयोगदेखि व्यावसायिक तथा साहसिक यात्रासम्मका ग्राहकलाई लक्षित गर्ने देखिन्छ। यसको आगमनसँगै नेपालमा तीव्र रूपमा विस्तार भइरहेको विद्युतीय पिकअप बजारमा नयाँ प्रतिस्पर्धा थपिएको छ।

Originally published on abcnews.com.np.