काठमाडौं । नेपाल राष्ट्र बैंकले हायर पर्चेज कर्जा प्रदान गर्ने कम्पनीहरूले निर्धारण गर्ने ब्याजदर, पेनाल ब्याज र सेवा शुल्कसम्बन्धी व्यवस्थामा संशोधन गरेको छ। राष्ट्र बैंकले ‘हायर पर्चेज कर्जा दिने कम्पनीलाई स्वीकृति दिने नीतिगत एवं प्रक्रियागत व्यवस्था, २०७०’ मा छैटौँ संशोधन, २०८३ जारी गर्दै कर्जा प्रवाहलाई थप पारदर्शी र व्यवस्थित बनाउन नयाँ मापदण्ड लागू गरेको हो।
संशोधित व्यवस्थाअनुसार अब हायर पर्चेज कम्पनीहरूले कर्जाको ब्याजदर निर्धारण गर्दा ‘कस्ट अफ फन्ड’लाई आधार मान्नुपर्नेछ। कस्ट अफ फन्ड निर्धारण गर्दा कम्पनीको स्वपुँजीको लागत र ऋणबाट प्राप्त कोषको भारित लागतलाई आधार बनाउनुपर्ने व्यवस्था गरिएको छ।
यसरी निर्धारण गरिएको ब्याजदरको विवरण कम्पनीले तीन दिनभित्र राष्ट्र बैंकको सुपरिवेक्षण विभागलाई जानकारी गराउनुपर्नेछ।
कम्पनीहरूले ग्राहकलाई प्रवाह गर्ने कर्जाको ब्याजदर निर्धारण गरी प्रकाशित गरिसकेपछि त्यसमा २ प्रतिशतभन्दा बढी थपघट गर्न नपाउने व्यवस्था पनि गरिएको छ। यसले ग्राहकलाई आफूले लिने कर्जाको ब्याजदरबारे स्पष्ट र पारदर्शी जानकारी प्राप्त गर्न सहयोग पुग्ने राष्ट्र बैंकको अपेक्षा छ।
त्यस्तै, हायर पर्चेज कर्जा सम्झौतामा वार्षिक पेनाल ब्याजदर २ प्रतिशत विन्दुभन्दा बढी नहुने गरी उल्लेख गर्नुपर्नेछ। म्याद नाघेको किस्ताको साँवा रकममा विलम्ब भएको अवधिका लागि तोकिएको पेनाल ब्याजदरअनुसार मात्र रकम असुल गर्न पाइनेछ।
पेनाल ब्याजमा पुनः ब्याज लगाएर रकम असुल गर्नसमेत कम्पनीहरूलाई रोक लगाइएको छ। यस व्यवस्थाले कर्जा भुक्तानीमा ढिलाइ गर्ने ग्राहकबाट असुल गरिने अतिरिक्त शुल्कलाई निश्चित सीमाभित्र राख्नेछ।
हायर पर्चेज कम्पनीहरूले कर्जा स्वीकृत गर्दा सेवा शुल्कबापत स्वीकृत कर्जाको अधिकतम १ प्रतिशतसम्म मात्र ग्राहकबाट लिन पाउने भएका छन्। यद्यपि, ग्राहकको आवश्यकताअनुसार अन्य संस्था वा निकायमार्फत सेवा लिँदा लागेको वास्तविक लागतभन्दा बढी नहुने गरी सेवा शुल्क लिन भने बाधा नपर्ने व्यवस्था गरिएको छ।
राष्ट्र बैंकले संशोधित व्यवस्थामार्फत हायर पर्चेज कर्जा क्षेत्रलाई थप व्यवस्थित, पारदर्शी र ग्राहकहितमैत्री बनाउने लक्ष्य लिएको छ। ब्याजदर निर्धारणमा स्पष्ट आधार, पेनाल ब्याजमा सीमा तथा सेवा शुल्कमा अधिकतम सीमा तोकिएपछि कर्जाग्राहीमाथि हुने अतिरिक्त वित्तीय भार नियन्त्रणमा सहयोग पुग्ने अपेक्षा गरिएको छ।
Originally published on abcnews.com.np.
प्रतिक्रिया दिनुहोस्