काठमाडौं । सिरियाको एक अदालतले पदच्युत राष्ट्रपति बशर अल–असद र उनका कान्छा भाइ माहेर अल–असदलाई मृत्युदण्डको सजाय सुनाएको छ । करिब पाँच लाख मानिसको ज्यान गएको १४ वर्ष लामो सिरियाली द्वन्द्वका क्रममा मानव अधिकार उल्लङ्घन तथा युद्ध अपराध गरेको अभियोगमा अदालतले मंगलबार यस्तो फैसला सुनाएको हो ।

बशर र माहेर दुवै अदालतमा उपस्थित थिएनन् । राजधानी दमस्कसस्थित अदालतले सुनाएको यो फैसला असद परिवारको पाँच दशक लामो शासन अन्त्य भएपछि बशर अल–असद वा उनको निकटवर्ती समूहका सदस्यविरुद्ध सुनाइएको पहिलो महत्वपूर्ण फैसला हो ।

आतिफ नजिबलाई पनि मृत्युदण्ड

सोही मुद्दामा बशर अल–असदका काकाका छोरा आतिफ नजिबलाई पनि मृत्युदण्डको सजाय सुनाइएको छ । उनलाई सिरियाको दक्षिणी प्रान्त दारामा भएको दमनको नेतृत्व गरेको अभियोगमा दोषी ठहर गरिएको हो ।

दारामा भएको उक्त दमनपछि सन् २०११ मा सरकारविरुद्ध विद्रोह सुरु भएको थियो । त्यसपछि विद्रोह विस्तार हुँदै सिरिया लामो समयसम्म गृहयुद्धमा फसेको थियो ।

कडा सुरक्षा व्यवस्थाबीच नजिबलाई कैदीको पोसाकमा अदालतमा उपस्थित गराइएको थियो । न्यायाधीशले उनीविरुद्धको फैसला पढेर सुनाएका थिए । फैसला सुन्न मध्य दमस्कसस्थित अदालत परिसरबाहिर सर्वसाधारणको ठूलो भीड जम्मा भएको थियो ।

रुसमा राजनीतिक शरण

सन् २०२४ डिसेम्बरमा बशर अल–असदको शासन पतन भएपछि उनी आफ्ना भाइ माहेरसहित रुस पलायन भएका थिए । रुसले उनीहरूलाई राजनीतिक शरण दिएको छ ।

सिरियाका नयाँ शासकहरूले असद दाजुभाइलाई सिरिया फिर्ता गर्न रुससँग निरन्तर आग्रह गर्दै आएका छन् ।

ऐतिहासिक फैसला

अदालतले बशर अल–असद, माहेर अल–असद र आतिफ नजिबलाई मानव अधिकार उल्लङ्घन तथा युद्ध अपराधका अभियोगमा दोषी ठहर गर्दै मृत्युदण्ड सुनाएको हो ।

१४ वर्ष लामो द्वन्द्व, ठूलो मानवीय क्षति र असद परिवारको लामो शासनपछि आएको यो फैसला सिरियाको राजनीतिक तथा न्यायिक इतिहासमा महत्वपूर्ण घटनाका रूपमा हेरिएको छ ।

Originally published on abcnews.com.np.