काठमाडौं । प्रजातान्त्रिक गणतन्त्र कंगोमा इबोलाको प्रकोप गम्भीर बन्दै गएको छ। मंगलबार सार्वजनिक गरिएको सरकारी तथ्यांकअनुसार कंगोमा इबोलाका ४ हजार ३८१ पुष्टि भएका संक्रमित भेटिएका छन्।

स्वास्थ्य अधिकारीहरूका अनुसार संक्रमितमध्ये २ हजार ११ जनाको मृत्यु भइसकेको छ भने ७०४ जना बिरामी अस्पतालमा भर्ना भई आइसोलेसनमाउपचाररत छन्।

दुर्गम क्षेत्रमा समेत समयमै स्वास्थ्य सेवा पुर्‍याउन स्वास्थ्यकर्मीहरूलाई कठिनाइ भइरहेको अधिकारीहरूले बताएका छन्।

यो तथ्यांक गत मे १५ मा इबोलाको प्रकोप घोषणा भएको करिब तीन महिनापछि सार्वजनिक गरिएको हो। यसपटकको प्रकोप विश्वकै दोस्रो ठूलो इबोला प्रकोप बनेको बताइएको छ।

यसअघि सन् २०१४ देखि २०१६ सम्म पश्चिम अफ्रिकामा फैलिएको इबोलाको प्रकोपमा २८ हजारभन्दा बढी संक्रमित भएका थिए। त्यसमध्ये ११ हजारभन्दा बढीको मृत्यु भएको थियो।

बुन्डिबुग्यो भाइरसका कारण प्रकोप

यसपटकको प्रकोप बुन्डिबुग्यो इबोला भाइरसका कारण फैलिएको हो।

विश्व स्वास्थ्य संगठन (डब्ल्यूएचओ)का अनुसार हाल यस भाइरसविरुद्ध स्वीकृत खोप वा विशेष उपचार उपलब्ध छैन।

दुर्गम तथा घना बस्ती भएका क्षेत्र, कमजोर स्वास्थ्य पूर्वाधार, असुरक्षा तथा मानिस र सामानको उच्च आवागमनका कारण इबोला नियन्त्रणमा थप चुनौती देखिएको डब्ल्यूएचओले जनाएको छ।

स्वास्थ्य अधिकारीहरूले दुर्गम क्षेत्रमा स्वास्थ्य सेवा तथा उपचारको पहुँच विस्तार गर्न नसके प्रकोप नियन्त्रणमा थप कठिनाइ हुन सक्ने बताएका छन्।

Originally published on abcnews.com.np.