बागलुङ । कालीगण्डकी नदीको कटानले बागलुङको प्रवेशद्वार मानिने मालढुङ्गा पुल जोखिममा परेको छ। पुलको पर्वततर्फको मुख्य पिलरको जगमा लगातार पहिरो जाँदा पुलको सुरक्षामाथि चिन्ता बढेको हो।

बागलुङ र पर्वत जोड्ने मालढुङ्गास्थित मोटरेबल पुलको जगमा अविरल वर्षापछि बढेको कालीगण्डकीको बहावले कटान गरेको सडक डिभिजन कार्यालयले जनाएको छ। गत बिहीबारदेखि पुलको जग क्षेत्रमा क्षति देखिन थालेको र अहिले माटो खसिरहेको बताइएको छ।

करिब तीन दशकअघि निर्माण भएको यो पुल मध्यपहाडी लोकमार्गअन्तर्गत पोखरा–बागलुङ सडकखण्डमा पर्छ। नदीको धार परिवर्तन र कटानका कारण पुल यसअघि पनि जोखिममा पर्दै आएको थियो।

पुलको प्रारम्भिक निरीक्षणपछि सडक डिभिजन कार्यालयले थप प्राविधिक मूल्याङ्कनका लागि डिभिजन सडक कार्यालय पोखरालाई जानकारी गराएको छ। कार्यालय प्रमुख इञ्जिनियर हरि सुवेदीका अनुसार अहिले नदीको बहाव उच्च रहेकाले तत्काल मर्मत गर्न सम्भव छैन। पानीको सतह घटेपछि क्षतिको विस्तृत अध्ययन गरी मर्मत तथा संरक्षणको काम अघि बढाइनेछ।

पुलको जग संरक्षणका लागि निर्माण गरिएको पर्खालसमेत भत्किएपछि सवारी आवागमनमा जोखिम बढेको छ। जिल्ला प्रहरी कार्यालय बागलुङले यात्रुवाहक तथा मालवाहक सवारीसाधनलाई सावधानी अपनाएर सञ्चालन गर्न दिइएको जनाएको छ।

नदी दोहनले थप जोखिम

सडक डिभिजन कार्यालयका अनुसार पुलको माथिल्लोतर्फ ५०० मिटर र तल्लोतर्फ एक किलोमिटरसम्म नदीजन्य पदार्थ उत्खनन गर्न नपाइने कानुनी व्यवस्था छ। तर, पुल आसपास नदीजन्य सामग्री उत्खनन तथा नदी दोहन भइरहेको भन्दै कार्यालयले यसले पुलसँगै मालढुङ्गा बस्तीसमेत थप जोखिममा परेको जनाएको छ।

डिभिजन सडक कार्यालय पोखराका इञ्जिनियर अमर अधिकारीका अनुसार नदीको बहाव घटेपछि पुलको विस्तृत प्राविधिक परीक्षण गरिनेछ। त्यसपछि पुलको जग संरक्षण र थप क्षति रोक्न आवश्यक मर्मत तथा संरचनागत काम अघि बढाइनेछ।

Originally published on abcnews.com.np.