काठमाडौँ । राष्ट्रिय स्वतन्त्र पार्टी (रास्वपा) सभापति रवि लामिछाने भदौ पहिलो साता चीन भ्रमणमा जाने भएका छन्। लामिछाने निकट एक नेताका अनुसार उनको आठदिने चीन भ्रमण भदौ ७ देखि १४ गतेसम्म अर्थात् अगस्ट २३ देखि ३० सम्म हुने तय भएको छ।

चिनियाँ कम्युनिस्ट पार्टीको निमन्त्रणामा लामिछाने पहिलोपटक चीन भ्रमणमा जान लागेका हुन्। रास्वपाले सत्ता सम्हालेपछि उनले यसअघि भारतीय जनता पार्टी (भाजपा)को निमन्त्रणामा पाँचदिने भारत भ्रमण गरेका थिए।

गत जेठ १९ देखि २३ गतेसम्म भएको भारत भ्रमणका क्रममा लामिछानेले भारतीय प्रधानमन्त्री नरेन्द्र मोदी, गृहमन्त्री अमित शाह, विदेशमन्त्री एस जयशंकर तथा राष्ट्रिय सुरक्षा सल्लाहकार अजित डोभालसँग भेटवार्ता गरेका थिए।

सी चिनफिङसँग भेटको सम्भावना न्यून

चीन भ्रमणका क्रममा चिनियाँ राष्ट्रपति तथा कम्युनिस्ट पार्टीका महासचिव सी चिनफिङसँग लामिछानेको भेट हुने सम्भावना न्यून देखिएको छ। प्रारम्भिक कार्यतालिकामा सीसँग भेटवार्ताको कार्यक्रम समावेश छैन।

भ्रमणबारे जानकार अधिकारीका अनुसार चिनियाँ प्रोटोकलअनुसार राष्ट्रपति वा सरकार प्रमुखसँग राष्ट्रप्रमुखस्तरमा भेटवार्ता हुने भएकाले लामिछानेको सीसँग भेट हुने सम्भावना कम रहेको हो।

चिनियाँ नेतासँग भेटवार्ता

बेइजिङमा लामिछानेले चीनका उपराष्ट्रपति हान झेङ र विदेशमन्त्री वाङ यीसँग भेटवार्ता गर्ने कार्यक्रम लगभग तय भएको जनाइएको छ।

उनको पहिलो भेट चिनियाँ कम्युनिस्ट पार्टी (सीपीसी)को विदेश विभागका प्रमुख लिउ हाइसिङसँग हुने बताइएको छ। लिउकै निमन्त्रणामा लामिछाने चीन भ्रमणमा जान लागेका हुन्।

लामिछानेले पाँच सदस्यीय प्रतिनिधिमण्डलको नेतृत्व गर्नेछन्। प्रतिनिधिमण्डलमा उनकी पत्नी निकिता पौड्यालसमेत सहभागी हुने जनाइएको छ।

बेइजिङपछि लामिछानेको टोली तिब्बतस्थित कैलाश मानसरोवरसमेत जाने कार्यक्रम रहेको बताइएको छ।

Originally published on abcnews.com.np.