मुक्तिनाथ, मुस्ताङ । मुस्ताङमा अनलाइन तथा सामाजिक सञ्जालमार्फत ठगी हुने घटना पछिल्लो समय बढ्दै गएको छ । उपहार, चिट्ठा तथा सस्तो मूल्यमा महँगा सामान पाउने प्रलोभनमा परी सर्वसाधारणले रकम गुमाउने गरेका छन् ।

थासाङ गाउँपालिका–३ का राकेश गौचन आकर्षक उपहार पाउने आशमा २१ हजार रुपैयाँ ठगीमा पर्नुभयो । उहाँले तराईका अजयकुमार दासलाई रकम पठाउनुभएको थियो । तर, अहिलेसम्म रकम फिर्ता भएको छैन ।

त्यस्तै, थासाङ गाउँपालिका–५ ताक्लुङका अजय विकले सस्तो मूल्यमा विद्युतीय स्कुटर किन्न भन्दै प्रतिमकुमार सिंहलाई ८ हजार ५ सय रुपैयाँ पठाउनुभयो । बागलुङको निसीखोला गाउँपालिका–३ का विवश चौधरी पनि आइफोन उपहार परेको भन्दै ५ हजार रुपैयाँ भन्सार शुल्क पठाएपछि ठगीमा पर्नुभयो । उहाँलाई थप ५० हजार रुपैयाँसम्म पठाउन भनिएको थियो ।

एक महिनामै तीन उजुरी

जिल्ला प्रहरी कार्यालय मुस्ताङका अनुसार चालु आर्थिक वर्ष २०८३/८४ को साउन महिनामै अनलाइन ठगीसम्बन्धी तीनवटा उजुरी दर्ता भएका छन् ।

गत आर्थिक वर्ष २०८२/८३ मा सामाजिक सञ्जाल, बैंकिङ कारोबार, अनलाइन सपिङ, पेमेन्ट, चिट्ठा, स्क्याम तथा अनलाइन गेमका नाममा ३२ जना ठगीमा परेका थिए । उनीहरूले १० लाख रुपैयाँभन्दा बढी गुमाएका थिए ।

अनलाइन ठगीसम्बन्धी उजुरी आर्थिक वर्ष २०८०/८१ मा दुईवटा रहेकोमा २०८१/८२ मा बढेर २१ वटा पुगेको जिल्ला प्रहरी कार्यालय मुस्ताङका सूचना अधिकारी प्रहरी निरीक्षक सन्तोष बस्यालले बताउनुभयो ।

शिक्षित पनि ठगीको सिकार

प्रहरीका अनुसार अनलाइन ठगीमा अशिक्षित मात्र नभई शिक्षित व्यक्ति पनि पर्ने गरेका छन् । थोरै मूल्यमा महँगो सामान तथा आकर्षक उपहार पाइने लोभमा विश्वास गर्दा ठगी हुने गरेको प्रहरी निरीक्षक बस्यालको भनाइ छ ।

गत आर्थिक वर्षका उजुरीका आधारमा प्रहरीले दुई जनालाई नियन्त्रणमा लिएर अनुसन्धानसमेत गरिरहेको जनाएको छ ।

चिट्ठादेखि अश्लील तस्बिरसम्म

फेसबुक अकाउन्ट ह्याक, अनलाइन सपिङ, मार्केटिङ, वैदेशिक रोजगारी, चिट्ठा तथा उपहार परेको भन्दै रकम माग्ने घटना बढी देखिएका छन् । ओटीपी कोड प्रयोग गरी बैंक खाताबाट रकम निकाल्ने घटना पनि प्रहरीमा पुग्ने गरेका छन् ।

त्यस्तै, फेसबुक, भाइबर, ह्वाट्सएप र म्यासेन्जरमार्फत अपरिचित व्यक्तिसँग सम्बन्ध बनाएर पछि नग्न वा अश्लील तस्बिर प्रयोग गरी ब्ल्याकमेल गर्ने घटना पनि बढिरहेको प्रहरीले जनाएको छ ।

यस्ता घटनामा बदनाम हुने डरले धेरै पीडितले परिवार तथा प्रहरीलाई जानकारी नदिने भएकाले वास्तविक संख्या अझै बढी हुनसक्ने प्रहरीको अनुमान छ ।

ओटीपी र बैंकिङ विवरण नदिन आग्रह

प्रहरीले चिट्ठा वा उपहार परेको भन्दै अपरिचित व्यक्तिबाट सन्देश आएमा तत्काल विश्वास नगर्न आग्रह गरेको छ । मोबाइल एपको लगइन, पासवर्ड, बैंक खाता नम्बर, ओटीपी कोड तथा अन्य बैंकिङ विवरण कसैलाई पनि नदिन प्रहरीले सचेत गराएको छ ।

सामाजिक सञ्जालबाट आएको आकर्षक प्रस्तावभन्दा सतर्कता र पुष्टि नै अनलाइन ठगीबाट बच्ने पहिलो उपाय रहेको प्रहरीको भनाइ छ ।

Originally published on abcnews.com.np.