काठमाडौं । देशभर मनसुनी वायुको प्रभाव कायम रहेको जल तथा मौसम विज्ञान विभागअन्तर्गतको मौसम पूर्वानुमान महाशाखाले जनाएको छ। मनसुनको न्यूनचापीय रेखा सरदर स्थान आसपास रहेकाले हिमाली तथा पहाडी क्षेत्रमा आंशिक बदली र तराई क्षेत्रमा मौसम मुख्यतया सफा रहेको छ।

महाशाखाले बिहान ८ बजे जारी गरेको मौसम बुलेटिनअनुसार आज दिउँसो हिमाली क्षेत्रमा साधारणतया बदली रहनेछ भने पहाडी र तराई क्षेत्रमा आंशिक बदली हुने सम्भावना छ। हिमाली तथा पहाडी भूभागका थोरै स्थानमा मध्यम वर्षा वा हिमपात तथा तराईका एक–दुई स्थानमा मध्यम वर्षाको सम्भावना रहेको छ।

आज राति कोशी, मधेश, बागमती र गण्डकी प्रदेशका साथै लुम्बिनी, कर्णाली र सुदूरपश्चिमका हिमाली तथा पहाडी क्षेत्रमा साधारणतया बदली रहनेछ। तीमध्ये केही स्थानमा मध्यम वर्षा तथा हिमपातको सम्भावना रहेको महाशाखाले जनाएको छ।

मधेश तथा कोशी, बागमती र गण्डकी प्रदेशका तराई भूभागका थोरै स्थानमा तथा लुम्बिनी र सुदूरपश्चिमका तराई क्षेत्रमा एक–दुई स्थानमा मध्यम वर्षाको सम्भावना रहेको छ।

काठमाडौँमा साँझपख पानी पर्ने सम्भावना

काठमाडौँ उपत्यकामा आज विशेषगरी साँझपख क्षणिक वर्षा हुने सम्भावना रहेको मौसमविद्ले बताएका छन्।

मौसमविद् डेभिड ढकालका अनुसार दिउँसो ३–४ बजेपछि उपत्यकामा बादल बढ्दै गएर हल्कादेखि कतिपय स्थानमा मध्यम वर्षा हुन सक्छ। यद्यपि लगातार ठूलो वर्षा हुने सम्भावना भने नरहेको उहाँले बताउनुभयो।

काठमाडौँको अधिकतम तापक्रम आज ३१ देखि ३३ डिग्री सेल्सियस बीच रहने अनुमान गरिएको छ। मंगलबार उपत्यकाको अधिकतम तापक्रम सन् २०२६ यताकै उच्च ३२.३ डिग्री सेल्सियस पुगेको थियो।

वर्षाको मापन

मौसमविद्का अनुसार २४ घण्टामा १० मिलिमिटरभन्दा कम वर्षालाई हल्का, १० देखि ५० मिलिमिटरसम्मलाई मध्यम र ५० देखि १०० मिलिमिटरसम्मलाई भारी वर्षा भनिन्छ।

त्यस्तै १०० देखि २०० मिलिमिटरसम्म धेरै भारी र २०० मिलिमिटरभन्दा बढी वर्षालाई अति भारी वर्षाका रूपमा वर्गीकरण गरिन्छ।

केही जिल्लामा आकस्मिक बाढीको जोखिम

बाढी पूर्वानुमान महाशाखाका अनुसार आज सोलुखुम्बु, दोलखा, रामेछाप, सिन्धुपाल्चोक लगायतका जिल्लाबाट बहने साना नदी तथा खोलामा पानीको बहाव उल्लेख्य बढ्न सक्नेछ। ती क्षेत्रमा आकस्मिक बाढीको मध्यम जोखिम रहेको महाशाखाले जनाएको छ।

महाशाखाले स्थानीय बासिन्दालाई नदी तथा खोला आसपासका क्षेत्रमा आवश्यक सतर्कता अपनाउन आग्रह गरेको छ।

‘थोरै’ र ‘केही स्थान’को अर्थ

मौसमविद्का अनुसार १० प्रतिशतभन्दा कम भूभागमा पानी पर्ने सम्भावना हुँदा ‘एक–दुई स्थान’, १० देखि ३० प्रतिशतमा ‘थोरै स्थान’ र ३० देखि ५० प्रतिशतमा ‘केही स्थान’ मा वर्षा हुने भनिन्छ।

त्यस्तै ५० देखि ८० प्रतिशत भूभागमा वर्षाको सम्भावना भए ‘धेरै स्थान’ र ८० प्रतिशतभन्दा बढीमा वर्षा हुने सम्भावना भए ‘अधिकांश स्थान’ भन्ने गरिन्छ।

Originally published on abcnews.com.np.