काठमाडौं । रौतहटको लालबकैया खोलामा नुहाउने तथा पौडी खेल्ने क्रममा डुबेर बेपत्ता भएका तीन बालबालिकामध्ये दुई जनाको मृत्यु भएको छ । एक बालिका अझै बेपत्ता छन् ।

देवाही गोनाही नगरपालिका–१ करुनियास्थित लालबकैया खोलामा मंगलबार नुहाउने क्रममा करुनियाका १० वर्षीय महमद रमतुलाह, १० वर्षीया सबनम खातुन र १० वर्षीया रौशन खातुन डुबेर बेपत्ता भएका थिए ।

बेपत्तामध्ये महमद रमतुलाह र सबनम खातुनको शव बुधबार बिहान फेला परेको प्रहरीले जनाएको छ । बिहान साढे ७ बजे घटनास्थलबाट करिब पाँच किलोमिटर दक्षिण परोहा नगरपालिका–२ जिंगडवास्थित लालबकैया खोला किनारमा उनीहरूको शव फेला परेको हो ।

प्रहरीका अनुसार दुवै शव करिब २०० मिटरको दूरीमा फेला परेका थिए ।

बेपत्ता रौशन खातुनको भने अझै अवस्था पत्ता लाग्न सकेको छैन । उनको खोजीका लागि प्रहरी र स्थानीयवासीले लालबकैया खोला तथा आसपासका क्षेत्रमा निरन्तर खोजी गरिरहेका छन् ।

Originally published on abcnews.com.np.