नेदरल्यान्ड्सको मुख्य प्रशिक्षक बने जाभी हर्नान्डेज

काठमाडौं । नेदरल्यान्ड्सले स्पेनका पूर्वमिडफिल्डर तथा बार्सिलोनाका पूर्वप्रशिक्षक जाभी हर्नान्डेजलाई राष्ट्रिय टोलीको मुख्य प्रशिक्षक नियुक्त गरेको छ।

डच फुटबल संघले बुधबार ४६ वर्षीय जाभीलाई नयाँ प्रशिक्षक नियुक्त गरेको घोषणा गरेको हो। उनी सन् २०३० को विश्वकपसम्म रहने गरी सम्झौतामा आबद्ध भएका छन्।

जाभीले रोनाल्ड कोम्यानको स्थान लिएका हुन्। कोम्यानले सन् २०२३ देखि २०२६ सम्म नेदरल्यान्ड्सको दोस्रो कार्यकाल सम्हालेका थिए।

जाभीले पहिलोपटक राष्ट्रिय टोलीको मुख्य प्रशिक्षकको जिम्मेवारी सम्हाल्न लागेका हुन्। यसअघि उनले कतारको अल साद र बार्सिलोनाको प्रशिक्षण सम्हालेका थिए। बार्सिलोनाबाट सन् २०२४ मा अलग भएपछि उनी प्रशिक्षकको भूमिकामा फर्किएका हुन्।

४८ वर्षपछि विदेशी प्रशिक्षक

जाभी नेदरल्यान्ड्सको पुरुष राष्ट्रिय टोली सम्हाल्ने ४८ वर्षपछिका पहिलो विदेशी प्रशिक्षक बनेका छन्। यसअघि सन् १९७८ मा अस्ट्रियाका एर्नस्ट हापेलले नेदरल्यान्ड्सको प्रशिक्षण सम्हालेका थिए।

जाभीको पहिलो ठूलो चुनौती आगामी यूईएफए नेसन्स लिग हुनेछ। नेदरल्यान्ड्सले सेप्टेम्बर २४ मा जर्मनीसँग खेल्दै नयाँ प्रशिक्षकको नेतृत्वमा यात्रा सुरु गर्नेछ।

Originally published on abcnews.com.np.