सुर्खेत । कर्णाली प्रदेश सरकारले चार वर्षदेखि रोकिएको खेलाडीको पुरस्कार रकम एकमुष्ट वितरण गरेको छ। विभिन्न राष्ट्रिय तथा अन्तर्राष्ट्रिय प्रतियोगितामा पदक जितेका कर्णालीका करिब १५० खेलाडीलाई पदकका आधारमा पुरस्कार प्रदान गरिएको हो।

कर्णाली प्रदेश खेलकुद विकास परिषद्का अनुसार अन्तर्राष्ट्रिय, राष्ट्रिय, राष्ट्रपति रनिङ शिल्ड तथा अन्तरप्रदेश खेलकुद प्रतियोगितामा पदक जितेका खेलाडीलाई प्रदेश सरकारले तोकेको मापदण्डअनुसार पुरस्कार दिइएको हो।

परिषद्का लेखा अधिकृत लभविक्रम शाहका अनुसार अन्तर्राष्ट्रिय प्रतियोगितामा स्वर्णपदक विजेतालाई २ लाख ५० हजार, रजतपदक विजेतालाई २ लाख र कास्यपदक विजेतालाई ७५ हजार रुपैयाँ पुरस्कार दिने व्यवस्था छ। एसियाली खेलकुदमा कास्यपदक जित्नेलाई १ लाख रुपैयाँ दिने निर्णय गरिएको छ।

त्यस्तै, राष्ट्रियस्तरका प्रतियोगितामा स्वर्णपदक विजेताले २० हजार, रजतपदक विजेताले १५ हजार र कास्यपदक विजेताले १० हजार रुपैयाँ पाउने व्यवस्था छ। सोही आधारमा राष्ट्रपति रनिङ शिल्ड र अन्तरप्रदेश खेलकुद प्रतियोगिताका पदक विजेतालाई पनि पुरस्कार दिइएको परिषद्ले जनाएको छ।

एलिसाले पाइन् ११ लाख ७० हजार

यसपटक सबैभन्दा बढी पुरस्कार कराँतेकी एलिसा रास्कोटीले प्राप्त गरेकी छन्। उनले पछिल्ला चार वर्षमा अन्तर्राष्ट्रिय तथा राष्ट्रिय प्रतियोगितामा जितेका विभिन्न पदकबापत ११ लाख ७० हजार रुपैयाँ एकमुष्ट पाएकी हुन्।

कराँतेकै प्रियंका शाहीले ३ लाख ५ हजार, दीपक हमालले १ लाख ५० हजार, कृतिका कटुवालले १ लाख २७ हजार र दीपक विकले ५० हजार रुपैयाँ पुरस्कार पाएका छन्।

कबड्डीतर्फ बिनिता पण्डित क्षेत्रीले १ लाख रुपैयाँ पुरस्कार प्राप्त गरेकी छन्। क्रिकेटतर्फ विपिन शर्मा, रोशन शाहीलगायत खेलाडीलाई पनि विभिन्न प्रतियोगितामा जितेका पदकका आधारमा पुरस्कार दिइएको परिषद्ले जनाएको छ।

५० लाखभन्दा बढी वितरण

यसपटक १४औँ, १५औँ र १६औँ राष्ट्रपति रनिङ शिल्ड तथा प्रथम अन्तरप्रदेश खेलकुद प्रतियोगिताका पदक विजेता खेलाडी पनि पुरस्कार पाउने सूचीमा समेटिएका छन्।

परिषद्का सदस्य–सचिव रविन्द्र चन्दका अनुसार चार वर्षदेखि रोकिएको पुरस्कार रकम वितरण गर्दा ५० लाख रुपैयाँभन्दा बढी खर्च भएको छ।

यस वर्ष पुरस्कारबाट छुटेका खेलाडीलाई आगामी पुरस्कार वितरणसँगै सम्मान गरिने चन्दले बताए। समयमै पुरस्कार उपलब्ध गराउँदै खेलाडीलाई राष्ट्रिय तथा अन्तर्राष्ट्रिय प्रतियोगितामा थप उत्साहित बनाउने उद्देश्यले पुरस्कार वितरणलाई निरन्तरता दिने परिषद्ले जनाएको छ।

Originally published on abcnews.com.np.