काठमाडौं । मलेसियामा हुने एसीसी प्रिमियर कप एकदिवसीय क्रिकेट प्रतियोगिताको खेलतालिकामा परिमार्जन गरिएको छ । यसअघि नेपालले सेप्टेम्बर १ तारिखमा आफ्नो पहिलो खेल खेल्ने भनिएको थियो, तर अब नयाँ तालिका अनुसार नेपालको पहिलो खेल अगस्ट ३१ तारिखमा हुने भएको हो।

नेपाल समूह ‘ए’ मा रहेको छ र सोही समूहको पहिलो खेलमा बहराइनसँग प्रतिस्पर्धा गर्नेछ । यस समूहमा नेपाल, बहराइन, हङकङ, आयोजक मलेसिया र साउदी अरेबिया छन् । अर्को समूह ‘बी’ मा यूएई, ओमान, कुवेत, कतार र सिंगापुर समावेश छन्।

नेपालले सेप्टेम्बर ३ तारिखमा मलेसिया, सेप्टेम्बर ६ तारिखमा साउदी अरेबिया र सेप्टेम्बर ८ तारिखमा हङकङसँग प्रतिस्पर्धा गर्नेछ । दुवै समूहबाट शीर्ष दुई टोलीले सेमीफाइनलमा स्थान पाउनेछन्। प्रतियोगिताको विजेता टोलीले आगामी वर्ष हुने एसिया कप क्रिकेट प्रतियोगितामा सहभागिता जनाउने अवसर प्राप्त गर्नेछ।

प्रतियोगिताका लागि नेपाल क्रिकेट संघ (क्यान)ले सन्दीप लामिछानेलाई कप्तान नियुक्त गर्दै १४ सदस्यीय नेपाली टोली घोषणा गरिसकेको छ ।

नेपाली टोली

क्यानले सार्वजनिक गरेको नेपाली टोलीमा सन्दीप लामिछाने (कप्तान), रोहितकुमार पौडेल, आसिफ शेख, दीपेन्द्रसिंह ऐरी, सन्दीप जोरा, अर्जुन कुमाल, देव खनाल, बसिर अहमद, इशान पाण्डे, गुल्सनकुमार झा, करण केसी, ललितनारायण राजवंशी, हेमन्त धामी र शेर मल्ल समावेश छन्।

Originally published on abcnews.com.np.