काठमाडौं । नेकपा (एमाले) भित्र नीति, पद्धति र संगठनात्मक सुधारको माग गर्दै ‘एमाले रूपान्तरण र पुनर्संरचनाका लागि पुनर्जागरण अभियान’ले पार्टी नेतृत्वलाई ध्यानाकर्षण पत्र बुझाएको छ ।

ललितपुरको च्यासलस्थित एमाले केन्द्रीय कार्यालयमा बुझाइएको पत्रमा पार्टी नेतृत्वको कार्यशैली, निर्वाचनमा भएको पराजयको समीक्षा र संगठनात्मक गतिविधिमा देखिएको सुस्तताप्रति गम्भीर प्रश्न उठाइएको छ ।

अध्यक्ष केपी शर्मा ओलीलाई सम्बोधन गर्दै बुझाइएको पत्रमा निर्वाचन सम्पन्न भएको करिब ६ महिना पुग्न लाग्दासमेत केन्द्रीय कमिटीको बैठक बस्न नसकेको विषयलाई गम्भीर र चिन्ताजनक भनिएको छ । निर्वाचनमा व्यहोरेको पराजयको वस्तुनिष्ठ समीक्षा गर्दै पार्टीमा नयाँ उत्साह भर्नुपर्ने समयमा नेतृत्वले बैठक टार्दै आएको अभियानको आरोप छ ।

अभियानले एमालेले जनताको विश्वास गुमाउँदै गएको दाबीसमेत गरेको छ । पत्रमा फागुन २१ गतेको जनादेशबाट बनेको सरकारप्रति जनतामा निराशा बढ्दै गएको र सरकारका अन्योलग्रस्त नीति तथा शासन सञ्चालनमा देखिएको अपरिपक्वताले राष्ट्रिय हित र सुरक्षामा समेत चिन्ता बढाएको उल्लेख छ ।

छिमेकी तथा अन्तर्राष्ट्रिय सम्बन्ध थप जटिल बन्दै गएको र जनताको दैनिक जीवन कष्टकर बन्दै गएको निष्कर्षसमेत अभियानले निकालेको छ ।

पार्टीले गठन गरेको ‘निर्वाचन समीक्षा तथा पार्टी पुनर्गठन कार्यदल’ले तयार पारेको प्रतिवेदन सार्वजनिक नगरिएको तथा पार्टीभित्र छलफलमा नल्याइएकोमा पनि अभियानले असन्तुष्टि जनाएको छ । कार्यदलका सुझावलाई नेतृत्वले बेवास्ता गर्दा कार्यकर्तामा अन्योल र निराशा बढेको पत्रमा उल्लेख छ ।

अभियानका पाँच प्रमुख माग

पुनर्जागरण अभियानले पार्टी नेतृत्वसमक्ष पाँच प्रमुख माग अघि सारेको छ ।

• निर्वाचन समीक्षा तथा पार्टी पुनर्गठन कार्यदलको प्रतिवेदन तत्काल सार्वजनिक गरी छलफल अघि बढाउनुपर्ने ।
• केन्द्रीय सचिवालय र केन्द्रीय कमिटीको बैठक अविलम्ब आह्वान गर्नुपर्ने ।
• निर्वाचनमा भएको पराजयको ‘निर्मम’ समीक्षा गर्नुपर्ने ।
• पार्टी शुद्धीकरण, सुदृढीकरण र पुनर्संरचनाको स्पष्ट खाका निर्माण गर्नुपर्ने ।
• कमिटी प्रणाली र आन्तरिक लोकतन्त्रलाई प्रभावकारी बनाउँदै व्यक्ति होइन, नीति र विधिलाई प्रधानता दिनुपर्ने ।

अभियानले आफूहरू पार्टी विभाजनको पक्षमा नभई एमालेभित्रै विधि र पद्धति स्थापित गर्ने पक्षमा रहेको स्पष्ट पारेको छ ।

‘हामी विश्वास गर्छौँ, नेकपा एमालेको समस्या समाधान गर्ने बाटो पार्टी बाहिर होइन, पार्टीभित्रैको विधानसम्मत र लोकतान्त्रिक प्रक्रियाबाटै सम्भव छ,’ ध्यानाकर्षण पत्रमा भनिएको छ ।

केन्द्रीय कार्यालयमा पत्र दर्ता

अभियानले केन्द्रीय कार्यालयका सचिव डा. भीष्म अधिकारीमार्फत पत्र दर्ता गराएको हो ।

पत्र बुझाउन अभियानका अगुवाहरू गजेन्द्र थपलिया, रोशन बस्नेत, रमेश पौडेल, शर्मिला कार्की, डा. सुरेन्द्र मानन्धर, बुद्धि परियार, नविना लामालगायत च्यासल पुगेका थिए ।

Originally published on abcnews.com.np.