काठमाडौं । पछिल्ला पाँच वर्षमा करिब ७० लाख नेपालीले विदेश यात्रा गरेका छन्। अध्ययन, वैदेशिक रोजगारी, भ्रमण, आफन्त भेटघाट, उपचारलगायत विभिन्न उद्देश्यले विदेश जाने नेपालीको संख्या निरन्तर बढिरहेको छ।

अध्यागमन विभागले सार्वजनिक गरेको ‘वार्षिक पुस्तिका २०८३’ अनुसार सन् २०२१ देखि २०२५ सम्म ६९ लाख ८२ हजार ५९२ जना नेपाली विदेश गएका छन्। तीमध्ये सबैभन्दा धेरैको गन्तव्य संयुक्त अरब इमिरेट्स (यूएई) बनेको छ।

सन् २०२१ मा ६ लाख २६ हजार ४८१ जना नेपाली विदेश गएका थिए। यो संख्या २०२२ मा १३ लाख ९७ हजार २५०, २०२३ मा १५ लाख ७२ हजार ४००, २०२४ मा १६ लाख ८५ हजार ४९२ हुँदै २०२५ मा १७ लाख ९६९ पुगेको छ।

यूएईमा सबैभन्दा धेरै नेपाली

पाँच वर्षको अवधिमा १३ लाख ५९ हजार ४६५ जना नेपाली यूएई पुगेका छन्। वार्षिक औसत २ लाख ७१ हजार ८९३ जना नेपाली यूएई गएको देखिन्छ। सन् २०२५ मा मात्रै २ लाख ९५ हजार ७४३ जना नेपाली यूएई पुगेका थिए।

यूएईपछि कतारमा ८ लाख ८२ हजार ४४५ र साउदी अरेबियामा ७ लाख २१ हजार ८३५ जना नेपाली पुगेका छन्।

भारत पाँच वर्षमा ५ लाख ६९ हजार २६५ नेपाली पुगेका साथ चौथो स्थानमा छ। खुला सीमाका कारण भारत जाने नेपालीको वास्तविक संख्या अझ बढी हुन सक्ने विभागले जनाएको छ।

मलेसियामा ५ लाख २९ हजार १८०, अस्ट्रेलियामा ४ लाख १२ हजार ८२५ र जापानमा ४ लाख ८ हजार ७४० नेपाली पुगेका छन्।

रोजगारी नै मुख्य उद्देश्य

विदेश यात्राको सबैभन्दा ठूलो कारण वैदेशिक रोजगारी देखिएको छ। पाँच वर्षमा ३७ लाख १८ हजार ४१० जना नेपाली रोजगारीका लागि विदेश गएका छन्।

त्यस्तै, ९ लाख ९९ हजार ८७८ जना घुम्न, ५ लाख ८१ हजार ८९१ जना आफन्त भेट्न र ४ लाख ८९ हजार ७८२ जना अध्ययनका लागि विदेश गएका छन्।

यसैगरी ३ लाख ७४ हजार ४०५ जना अस्थायी बसोबास, २ लाख ९९ हजार ३२२ जना स्थायी बसोबास, ९९ हजार ७४६ जना डिपेन्डेन्ट र ७९ हजार ५७ जना उपचारका लागि विदेश गएको तथ्याङ्क छ।

केही देशमा बढ्यो, केहीमा घट्यो

पछिल्लो पाँच वर्षको तुलनामा केही गन्तव्यमा नेपालीको संख्या उल्लेख्य बढेको छ। ओमान जाने नेपालीको संख्या पाँच वर्षको औसतभन्दा सन् २०२५ मा ११७ प्रतिशतले बढेको छ। थाइल्याण्ड जानेको संख्या ७४ प्रतिशत, दक्षिण कोरिया ५९ प्रतिशत र जापान जाने नेपालीको संख्या ५८ प्रतिशतले बढेको छ।

यसको विपरीत मलेसिया जाने नेपालीको संख्या पाँच वर्षको औसत १ लाख ५ हजार ८३६ बाट घटेर सन् २०२५ मा ८९ हजार ६५९ मा झरेको छ।

सन् २०२५ का प्रमुख गन्तव्य

सन् २०२५ मा सबैभन्दा धेरै नेपाली गएको देशको सूचीमा यूएईपछि कतार र साउदी अरेबिया छन्।

• यूएई: २,९५,७४३
• कतार: १,८२,४९६
• साउदी अरेबिया: १,५४,१४३
• भारत: १,४२,१२४
• जापान: १,२९,०४९
• अस्ट्रेलिया: १,१२,१५१
• मलेसिया: ८९,६५९
• बेलायत: ६२,८५०
• कुवेत: ६१,९९७
• अमेरिका: ५९,९३८

यसले नेपालीको विदेश यात्रा अब वैदेशिक रोजगारीमा मात्र सीमित नभई अध्ययन, भ्रमण, स्थायी बसोबास र पारिवारिक प्रयोजनतर्फ समेत विस्तार भइरहेको देखाउँछ।

Originally published on abcnews.com.np.