काठमाडौं । एभरेस्ट महिला भलिबल लिग (ईडब्ल्यूभी) को तेस्रो संस्करणका लागि नयाँ फ्रेन्चाइज टोली सुदूरपश्चिम रोयल वारियर्सको औपचारिक घोषणा गरिएको छ ।

सुदूरपश्चिम रोयल वारियर्सको सहभागिताले नेपालमा व्यावसायिक महिला भलिबलको राष्ट्रिय पहुँच थप विस्तार हुने अपेक्षा गरिएको छ ।

फ्रेन्चाइजको स्वामित्व उमा गौतम भण्डारी, सञ्जीप शाही र श्कुमार भण्डारीसँग रहेको छ ।

फ्रेन्चाइज स्वामित्व समूहका तर्फबाट सञ्जीप शाहीले सुदूरपश्चिममा भलिबलप्रति ठूलो प्रतिभा र उत्साह भए पनि राष्ट्रिय महिला भलिबल लिगमा आफ्नै फ्रेन्चाइज टोलीमार्फत प्रतिनिधित्व हुन नसकेको बताए ।

उनले सुदूरपश्चिमको शक्ति र पहिचानलाई प्रतिनिधित्व गर्ने टोली निर्माण गर्दै युवा महिलालाई भलिबलमार्फत अर्थपूर्ण अवसर सिर्जना गर्नु टोलीको मुख्य उद्देश्य रहेको बताए ।

एभरेस्ट महिला भलिबल लिगकी प्रमुख कार्यकारी अधिकृत स्नेभी चापागाईंले ईडब्ल्यूभीको तेस्रो संस्करणमा सुदूरपश्चिम रोयल वारियर्सलाई स्वागत गर्न पाउँदा गौरवान्वित भएको बताइन् ।

उनले नयाँ टोलीको प्रवेशले महिला भलिबलको विकाससँगै देशका विभिन्न क्षेत्रका प्रतिभालाई राष्ट्रिय मञ्चमा ल्याउन थप सहयोग पुग्ने विश्वास व्यक्त गरिन् ।

Originally published on abcnews.com.np.