काठमाडौं । भारतीय ब्याट्री रिसाइकल कम्पनी रिब्याटका संस्थापक तथा प्रमुख कार्यकारी अधिकृत (सीईओ) करण खुरानाले नेपाली अटो व्यवसायीलाई विद्युतीय सवारीसाधनका ब्याट्री व्यवस्थापनको जिम्मेवारी दिनु व्यावहारिक नभएको बताएका छन् ।

नेपाल अटोमोबाइल्स इम्पोर्टर्स एण्ड म्यानुफ्याक्चरर्स एसोसिएसन (नाइमा)ले आयोजना गरेको ‘ब्याट्री रिसाइकल र इन्धनमा इथानोल मिश्रण’ संवादमा बोल्दै खुरानाले ब्याट्री व्यवस्थापन अटो व्यवसायीको मुख्य व्यावसायिक दायित्वभित्र नपर्ने भएकाले उनीहरूलाई नै जिम्मेवारी दिनु उचित नहुने बताएका हुन् ।

उनका अनुसार नेपालमा हाल ब्याट्री रिसाइक्लिङको छुट्टै उद्योग छैन र पुराना ब्याट्रीको व्यवस्थापन तथा प्रशोधनका अधिकांश काम विदेशमा हुने गरेका छन् । विद्युतीय सवारीसाधनको प्रयोग बढेसँगै पुराना ब्याट्रीको व्यवस्थापन चुनौतीपूर्ण बन्दै गएको उनले बताए ।

खुरानाले नेपालको भौगोलिक अवस्था र भारतसँगको खुला सीमाका कारण ब्याट्रीको संकलन, व्यवस्थापन तथा ट्र्याकिङमा थप चुनौती रहेको बताए । नेपालबाट लेड–एसिडलगायतका ब्याट्री अनधिकृत रूपमा भारततर्फ जाने जोखिम रहेको उनको भनाइ छ ।

उनले राजमार्गका विभिन्न स्थानमा सरकारले आधिकारिक ब्याट्री संकलन केन्द्र स्थापना गर्नुपर्ने सुझाव दिए । काठमाडौंमा ब्याट्री रिसाइक्लिङको इकोसिस्टम बनाउन तुलनात्मक रूपमा सहज भए पनि दुर्गम तथा हिमाली क्षेत्रमा संकलन र व्यवस्थापन जटिल हुने उनले बताए ।

सरकारले रिसाइक्लिङलाई मात्र बाध्यकारी बनाउनुको सट्टा स्पष्ट नियम, मापदण्ड र निर्देशिका बनाउनुपर्ने उनको सुझाव छ ।

ब्ल्याक मास लिथियम–आयन ब्याट्रीको हकमा ब्याट्री खोलेर प्लास्टिक, एल्युमिनियम, कपरलगायतका सामग्री छुट्याउनुपर्ने उनले बताए । नेपालमा हाल ब्ल्याक मास रिसाइक्लिङ गर्ने प्रविधि नभए पनि प्रशोधनपछि भारत वा अन्य देशमा निर्यात गरेर मूल्य अभिवृद्धि गर्न सकिने उनको भनाइ छ ।

Originally published on abcnews.com.np.