काठमाडौं । नेपाल आयल निगमले आजदेखि काठमाडौंका पाँच स्थानबाट एलपी ग्यास वितरण गर्ने भएको छ। जिल्ला प्रशासन कार्यालय, काठमाडौं र निगमको समन्वयमा तोकिएका बिक्री केन्द्रबाट विभिन्न ब्रान्डका ग्यास सिलिन्डर उपलब्ध गराउन लागिएको हो।

निगमका अनुसार अत्यावश्यक परेका उपभोक्ताले बिहान १० बजेदेखि साँझ ६ बजेसम्म तोकिएका केन्द्रमा पुगेर ग्यास खरिद गर्न सक्नेछन्। ग्यास लिन जाने उपभोक्ताले नागरिकता प्रमाणपत्र वा राष्ट्रिय परिचयपत्र अनिवार्य रूपमा साथमा लैजानुपर्नेछ।

कुन ठाउँमा कुन ग्यास पाइन्छ?

१. नेपाल आयल निगम, टेकु परिसर
यहाँ नेपाल, एचपी, एभरेस्ट/सुगम, श्रीराम, सगर, सिद्धार्थ, श्री र हिमाल ब्रान्डका ग्यास उपलब्ध हुनेछन्।

२. यातायात कार्यालय परिसर, चाबहिल
नेपाल र एचपी ब्रान्डका ग्यास सिलिन्डर बिक्री गरिनेछ।

३. राधास्वामी, कीर्तिपुर परिसर
नेपाल, एचपी, एभरेस्ट/सुगम, श्रीमाया, श्रीकृष्ण, साइजवाला र ओम ग्यास उपलब्ध हुनेछ।

४. राधास्वामी, बसुन्धरा परिसर
नेपाल, एचपी, एभरेस्ट/सुगम, भानु र ओम ब्रान्डका ग्यास बिक्री गरिनेछ।

५. पुरानो जिल्ला प्रशासन कार्यालय, बबरमहल
नेपाल, एचपी, एभरेस्ट/सुगम, श्रीराम, सगर, हिमाल, लोकप्रिय र सूर्य ग्यास उपलब्ध हुने निगमले जनाएको छ।

बिहान १० देखि साँझ ६ बजेसम्म बिक्री

निगमले तोकिएका केन्द्रबाट बिहान १० बजेदेखि साँझ ६ बजेसम्म ग्यास बिक्री हुने जनाएको छ। उपभोक्ताले आफ्नो परिचय खुल्ने आधिकारिक कागजात लिएर मात्र बिक्री केन्द्रमा जानुपर्नेछ।

आयात नियमित छ : निगम

नेपाल आयल निगमले एलपी ग्यासको आयात नियमित रूपमा भइरहेको र ग्यास उद्योगहरूले पनि आफ्ना आधिकारिक विक्रेतामार्फत नियमित बिक्री गरिरहेको जनाएको छ।

ग्यासको अभाव भएको भन्दै उपभोक्तामा अनावश्यक त्रास सिर्जना हुनसक्ने भन्दै निगमले आवश्यकताअनुसार मात्र ग्यास खरिद गर्न र अनावश्यक रूपमा लामो लाइनमा नबस्न आग्रह गरेको छ।

पछिल्लो समय ग्यास अभावका कारण उपभोक्ताले समस्या भोग्दै आएको अवस्थामा निगमले अतिरिक्त बिक्री केन्द्र सञ्चालनमा ल्याएको हो। निगमका अनुसार नयाँ व्यवस्थाको उद्देश्य अत्यावश्यक परेका उपभोक्तालाई सहज रूपमा ग्यास उपलब्ध गराउनु हो।

Originally published on abcnews.com.np.